Bu gün Avropa çempionatında 1/8 final mərhələsinə start veriləcək.
Apasport.az saytının məlumatına görə, ilk oyun günündə 3 qarşılaşma baş tutacaq.
İlk olaraq meydana İsveçrə və Polşa milliləri çıxacaqlar. A və C qrupunun ikinciləri ilk 1/4 finalçı olmaq üçün mübarizə aparacaqlar. İsveçrənin heyətlə bağlı problemi olmasa da, Polşa haqqında bunu demək olmaz. Belə ki, qapıçı Voyçex Şesni və Bartoj Kapustka bu oyunda meydana çıxmayacaqlar. “Çərçivə qoruyucusu” zədə, yarımmüdafiəçi isə cəza səbəbindən matçı kənardan izləməli olacaqlar.
Günün ikinci oyunu isə Britaniya derbisi olacaq. B qrupunu lider olaraq tamamlayan Uels ən yaxşı "üçüncü"lərdən biri olan Şimali İrlandiya ilə qarşılaşacaq. Gözlənilənlərin əksinə olaraq, olduqca əla təsir bağışlayan "əjdahalar" tarixi ilkə imza ataraq, qatıldığı ilk birincilikdə qrupdan çıxmağı bacaran Şimali İrlandiyanın Fransa səyahətini sona çatdırmaq niyyətindədi.
Gecənin son oyunu isə olduqca gərgin mübarizə vəd edir. Ölüm qrupu adlandırılan D qrupundan lider kimi çıxan Xorvatiya millisi növbəti mərhələyə qələbəsiz adlayan Portuqaliya ilə oynayacaq. Ən zəif qrup hesab olunan F qrupundan 3 heç-heçə ilə ən yaxşı üçüncü kimi çıxan pireneylilər bu dəfə sevimli nəticələrinə ümid edə bilməyəcəklər. Ronaldonun yoldaşları Xorvatiya səddini aşmaq üçün daha güclü çıxış etmək məcburiyyətindədirlər.
Avropa çempionatı 1/8 final 25 iyun
17:00. İsveçrə - Polşa Baş hakim: Mark Klattenburq Sent-Etyenn. “Joffrua Qişar” stadionu
20:00. Uels – Şimali İrlandiya Baş hakim: Martin Atkinson Paris. “Stad de Frans”
23:00. Xorvatiya - Portuqaliya Baş hakim: Karlos Velasko Karbalyo Lans. “Bollar-Delelis” stadionu