İranlı futbolçu türkləri növbəti dəfə təhqir etdi - FOTO
Qətərdə keçirilən U-23 futbol turnirinin finalında Türkiyə və İran millilərinin qarşılaşması insidentlə yadda qalıb.
APA-nın məlumatına görə, martın 25-də keçirilən matçda İran yığmasının oyunçusu Möhsün Müsəlman komandasının üçüncü qolunu vurduqdan sonra üzünü stadiondakı türklərə tutaraq onları əl hərəkəti ilə təhqir edib. O əllərini qulaqlarına apararaq eşşəyi yamsılayıb və bununla türklərə “eşşəksiniz” mesajı göndərib.
Qeyd edək ki, M. Müsəlman İsfahanın “Zob Ahən” futbol komandasının oyunçusudur. O bu il yanvarın 24-də Təbrizin “Traktor” komandası ilə “Zob Ahən” futbol komandalarının oyununda da qol vurduqdan sonra üzünü stadiondakı 40 min nəfərlik “Traktor” azarkeşlərinə tutaraq, onları eyni cür təhqir edib. Oyundan sonra “Zoh Ahən” komandasının məşqçisi M. Müsəlmanın bu hərəkətindən narahat olduğunu və oyunçunun 20 milyon tümən miqdarında cərimələndiyini açıqlayıb.
Dohada keçirilən U-23 turnirinin final matçı İran yığmasının 3-2 hesablı qələbəsi ilə başa çatıb.
