Bakı Ali Neft Məktəbində (BANM) Çinin ən böyük transmilli şirkətlərindən olan “Huawei” şirkətinin Azərbaycan nümayəndəliyi ilə görüş keçirilib.
Görüşdə BANM-ın rektoru Elmar Qasımov, “Huawei” şirkətinin Azərbaycan nümayəndəliyinin rəhbəri Lu Kanlin, şirkətin proqramlar üzrə menecerləri Eldar Cəbrayılov və Tao Ziven, Ali Məktəbin tələbləri və məsuləməkdaşları iştirak ediblər.
Tədbirdə qonaqları Ali Məktəbdə salamlayan rektor çoxlu sayda transmilli şirkətlərlə əməkdaşlıq edən BANM-ın partnyorları sırasına “Huawei” şirkətinin də qoşulmasından çox məmnun olduğunu bildirib.
O qeyd edib ki, gələcək nəsli İT baxımından daha mükəmməl yetişdirmək məqsədilə biliklərini daim paylaşan “Huawei” şirkətinin BANM-ın Proseslərin avtomatlaşdırılması kafedrası və bu ixtisasda təhsil alan tələbələrilə çalışması onun sosial iş prinsiplərilə üst-üstə düşəcəyini deyib.
“Huawei” şirkətinin Azərbaycan nümayəndəliyinin rəhbəri Lu Kanlin avtomatika sahəsində güclü mütəxəssislər hazırlayan BANM ilə təmsil etdiyi şirkətin əməkdaşlığını yüksək qiymətləndirdiyini və bu əməkdaşlıq üçün lazımi dəstək göstərilməsinə hazır olduğunu qeyd edib.
Daha sonra şirkətin proqramlar üzrə meneceri Tao Ziven Ali Məktəbin tələbələrinə şirkətin tarixi, onun fəaliyyət sahələri, korporativ dəyərləri, iş prinsipləri haqqında təqdimat edib, tələbələri maraqlandıran çoxsaylı sualları cavablandırıb.
Görüşdə, həmçinin, BANM ilə “Huawei” şirkətinin Azərbaycan nümayəndəliyi arasında Anlaşma Memorandumu imzalanıb. Memorandumun əsas məqsədi BANM-da yüksəkixtisaslı mütəxəssislərin hazırlanması üçün zəruri maddi-texniki, elmi-metodiki və təşkilati tədbirlərin həyata keçirilməsini təmin etməkdir.
Memorandumun şərtlərinə əsasən, tərəflər Ali Məktəbin tələbələrinin şirkətin təşkil etdiyi təcrübə proqramlarında iştirakı, şirkətin xaricdən Azərbaycana gələn mütəxəssislərinin BANM-ın tələbələri üçün mühazirələr oxumasının təşkil olunması, tədris prosesində istifadə üçün Ali Məktəbin proqram təminatı ilə təchiz edilməsi, BANM məzunları üçün şirkətin müvafiq tələb və şərtləri çərçivəsində karyera imkanlarının yaradılması istiqamətlərində əməkdaşlıq edəcəklər.
çap et