ŞƏHİD XATİRƏLƏR
Bir zamanlar,
Uşaq yaddaşımın bir küncündə
İlişib qalan,
Gecələr yuxularımı isladıb
Yanağımda iz salan,
Hərtərəfinə xatirələrim dağılan,
Bir həyat, bir ev vardı.
Üstündə qoca utacağının
Yüz illik kölgəsi,
qulağında "Orta kəhriz"in,
"Xəlfə bulağı"nın nəğməsi olardı.
Yuxuda hərdən o yerlərə
Baş çəkirəm,
Köhnə uşaq sevinclərimlə
gülüşlərimlə nəşələnirəm.
Hər yanda yeri görünür
Süd qoxulu, xatirələrin,
Evimizin divarından şəkili asılıb
Ötən bəxtəvər illərin.
Bax, nənəm yenə toyuq-cücə dənləyir,
Babam dəhrə, dəryaz itiləyir,
Anam qardaşımın nənnisini
Layla-bayatı ilə yelləyir.
Günəş qızıl saçlarını
Çiyninə tökən qız kimi
Üfüqdən gülümsəyir.
Həyətimiz yuxudan oyanır,
otaqları gəzirəm bir-bir,
Hər əşya bir hekayət söyləyir.
Dəmiz çarpayının başının üstündə
Qara çərçivədə, əsgər geyimində
Bir gəncin şəkli asılıb,
Altında "Müharıbəyə lənət!" yazılıb.
Nənəm yenə şəkli sinəsinə basıb
canlı insa kimi söhbət qurur,
Adını verdiyi nəvəsini
Sinəsinə basıb ovunur,
Xatirələrin acısı da, şirini də
Burda basabas yaradır.
Xəcalət alnımda puçurlayır.
Bilmirəm, hansını kiridəm,
Heyif, şəhid xatirələri
Bir yerə yığa bilmirəm.
TORPAQ OLMAĞA
Əllərimdə bəxt yazısı,
Tale pıçıltısı.
Ömür yolumuzun son xəzəl xırıltısı.
Oxu, əllərimi oxuya bilsən,
Üzünü əllərimə söykə
Dualarımı eşidərsən.
Əllərimdən tutsan tale yolumuzun
Hansı döngəsində, hansı küçəsində
Varıq bilərsən.
Bu yolla dayanacaqsız, gedən
Qatarın sərnişinləriyik,
Sən də, mən də,
Bizdən öndə gedənlər də,
Bizdən sonda gələnlərdə.
O qatarın dalınca gündə çıxacaq,
Qarda yağacaq,
Tüsdüdə göydə buz bağlayacaq,
Hardasa axşam düşəcək,
Hardasa gündüz olacaq,
Hardasa bir körpə də doğulacaq.
Özgə yol yoxdur
Bu qatar bir üzə gedir,
Geri qayıtmayacaq.
Əllərimdən tut,
Üzünü əllərimə söykə,
Gedək bu yolun o başından
Özümüzə baxmağa,
Gedək torpaq olmağa.
YAŞAMAĞA DƏYMƏZ Kİ...
Ümid yaxşı şeydi,
Yazıda qırılmaya hər nədən,
Ona söykənəsən, güvənəsən,
Ümidinə, ümid biləsən.
Ümid yaxşı şeydi,
Ümidli adam yarı yolda qalmaz.
Bərk yapışsan hətta ölüm də
Qapını vaxtsız döyməyə qoymaz.
Həsrət, kədər ürəyə yol tapmaz.
Köhnə xatirələrı,
Unudulmuş sevgini,
Ölmüş duyğuları da dirildər ümid,
Dərdi ovudar, kədəri
Kiridər ümid.
Ümidsiz boş olar ömür,
Arzu, istək, sevgi də
Çəkilər bir-bir.
Həyat, mənasız olar insana.
Tükənər yaşamağa olan təmənna.
Gözündə dəyişər dünyanın rəngi,
Ümidsiz yaşamağa
Dəyməz ki...
VƏTƏN TƏRƏFİ
Sərhədlərimizdə ayıq-sayıq duran əsgərlərimizə
Gecə yatdığınız rahat yuxular,
Səngərdə sizlərin sayıqlığıdır.
Sizə güvənirik, sizə oğullar.
Hünəriniz hər an üzağlığıdır.
O üçrəngli bayraq qürur yerimiz,
Sancıldığı yerə vətəndi - dedi.
Toxumtək torpağa düşən şəhidin
Məzarı önündə başını əydi.
Zəfər gözləyirik nə vaxtdan bəri,
Əliniz əsməsin düşmən önündə.
And için şəhidlər yatdığı yerə,
Qana-qan, ölümə-ölüm deyəndə.
Baxın, Lələtəpə qarşınızdadı,
Qisas qiyamətə bilin ki, qalmaz.
Torpağımız indi param parçadı,
Torpaq bölünəndə vətən sayılmaz.
Qartaltək şığıyın qarı düşmənin,
Alayı pozulsun, qırılsın səfi
Könlünü alın siz Xudafərinin,
Öyünsün yurdumun vətən tərəfi.
Gecə yatdığımız rahat yuxular,
Səngərdə sizlərin sayıqlığıdır.
Sizə güvənirik, sizə, oğullar,
Hünəriniz hər an üzağlığıdır.
APARIN İŞIQGƏLƏNƏ
Yaman qəribsədim, a yollar yenə,
Aparın siz məni işıqgələnə.
Mən səma qızıyam, məkanım göylər,
Ayrılıq havası bağrımı teylər.
Gözümə, könlümə siz işıq verin.
Şeirimə mavidən yaraşıq verin,
Əlimi yetirin o üfüqlərə,
Dan yeri şəfəqlər saldığı yerə.
Yol versin qoy mənə ulduz karvanı,
Qucum ruhum gəzən mavi səmanı.
Batıb dərələrin çən-lüsəyinə,
Düşüm dağlarımın göy ətəyinə.
Zirvədə şimşəklə görüşüm yenə,
Mən ordan boylanım işıq gələnə.
Söykənim vüqarım, arxam dağlara,
O atam dağlara, babam dağlara.
Yaman qəribsədim, a yollar yenə,
Aparın siz məni işıqgələnə.
çap et