Dünən M.F.Axundzadə adına Azərbaycan Milli Kitabxanasında Gürcüstan Yazıçılar Birliyinin sədri, "Sxivi-Şəfəq" jurnalının redaktoru, şair Bağater Arabulinin "Gündüz yuxuları" adlı kitabının təqdimat mərasimi keçirilib.
Tədbir Azərbaycan Tərcümə Mərkəzi və Azərbaycan Milli Kitabxanasının birgə təşkilatçılığı ilə reallaşıb.
Tədbirdə Azərbaycan Dövlət Tərcümə Mərkəzi İdarə Heyətinin sədri Afaq Məsud qonaqları salamlayaraq, Azərbaycan-Gürcüstan ədəbi əlaqələrinin qədimliyindən danışıb, şair Allahverdi Təhləlinin Azərbaycan dilinə tərcümə etdiyi kitabın həmin əlaqələrin davamı olduğunu qeyd edib. A.Məsud Azərbaycan-Gürcüstan ədəbi əlaqələri sahəsində görülən işlərdən, gürcü dilinə tərcümə edilərək, Tbilisidə nəşr olunmuş "Azərbaycan ədəbiyyatı antologiyası" və Azərbaycan dilində Bakıda nəşr edilmiş "Gürcü hekayələri" kitabından da söz açıb.
Milli Məclisin deputatı, akademik Nizami Cəfərov gürcü poeziyası ilə Azərbaycan oxucusunu tanış edən kitabın dilimizi öz təfəkkür orijinallığı ilə, bəzi arxaizmləri ana dilimizdə canlandırmaqla zənginləşdirdiyini qeyd edib.
Millət vəkili, yazıçı Aqil Abbas çıxışında şairin dünyagörüşünü, tərcüməni çox bəyəndiyini, kitabı zövqlə oxuduğunu deyib.
Gürcüstanın Azərbaycandakı səfiri Zurab Pataradze çıxışında əsas məqsədi Azərbaycan oxucusunu, gələcək nəsilləri gürcü ədəbiyyatı ilə tanış etmək olan bu cür kitabın ərsəyə gəlməsinə və təqdimatının təşkilinə görə Tərcümə Mərkəzinə təşəkkür edib.
Avrasiya Yazarlar Birliyi adından Yaqub Öməroğlu gürcü ədəbiyyatına məxsus digər yazarların əsərlərinin də gələcəkdə tərcümə olunmasını zəruri sayıb.
Türkiyənin Azərbaycandakı Səfirliyinin Mədəniyyət və Tanıtma müşaviri İrfan Çiftçi gürcü ədəbiyyatını çox sevdiyini, bu kitab ilə gürcü ədəbiyyatının 300 milyonluq türk dünyasına təqdim edildiyini bildirib.
Kitabın ön sözünün müəllifi, professor Rüstəm Kamal qədim gürcü xalqının möhtəşəm mədəniyyətə malik olduğunu, gürcü şairlərin daxilən azad, sərbəst yaradıcı insanlar kimi modern formalara üz tutduqlarını qeyd edib.
Milli Kitabxananın direktoru, professor Kərim Tahirov təqdima olunan bu kitabın gürcü ədəbiyyatının ölkəmizdə təbliğində mühüm rol oynayacağını diqqətə çatdırıb.
AMEA Nizami adına Ədəbiyyat İnstitutunun şöbə müdiri, professor Bədirxan Əhmədov, şairlər Zakir Fəxri, Nigar Həsənzadə, yazıçı Etimad Başkeçid və digər çıxışçılar nəşrin və ədəbi əlaqələrin önəmindən danışıblar.
Kitabın müəllifi şair Bağater Arabuli əsərlərinin Azərbaycanda ilk dəfə nəşr olunduğunu bildirib, dost və qardaş ölkədə tanınmaqdanməmnunluğunu ifadə edib.
Şahanə MÜŞFİQ
çap et