Ekoloji Nəzarət postunda qəza: ölən və yaralananlar var - Yenilənib

Bakının Binəqədi rayonu, DYP-nin Ekoloji Nəzarət postunun yaxınlığında baş vermiş yol qəzasında xəsarət alan piyadalardan biri dünyasını dəyişib.

ONA-nın xəbərinə görə, bu, YPX müfəttişləri tərəfindən Respublika Klinik Xəstəxanasına çatdırılan 27 yaşlı Çobanov Rüfət Mehman oğludur. Xəsarətləri ağır olduğu üçün həkimlər onun həyatını xilas edə bilməyib.

Yol qəzasında xəsarət alan digər yaralılardan Rüfətin qardaşı Rufan Çobanova ilkin tibbi yardım göstərilib və o, sonrakı müəlicə üçün evə buraxılıb. Onların əmisi oğlu - 1991-ci il təvəllüdlü Eldarov Əfqan Elxan oğlunun vəziyyəti isə orta-ağır qiymətləndirilib. O, müalicəsini xəstəxanada alacaq.

*** 01:07

Bakının Binəqədi rayonu, DYP-nin Ekoloji Nəzarət postunun yaxınlığında baş vermiş yol qəzasında xəsarət alan piyadaların kimliyi müəyyən edilib.

ONA-nın xəbərinə görə, hadisə nəticəsində ağır xəsarət alaraq Respublika Klinik Xəstəxanasına çatdırılan şəxs Rüfət Çobanovdur.

Onun qardaşı Rufan Çobanov və əmisi oğlu Əfqan Eldarov isə nisbətən yüngül xəsarət alıb. Hər iki şəxs 1 saylı Xəstəxanaya aparılıb.

*** 00:31

Bakının Binəqədi rayonu ərazisində avtomobil 3 piyadanı vurub.

ONA-nın xəbərinə görə, hadisə DYP-nin Ekoloji Nəzarət postunun yaxınlığında qeydə alınıb.

Belə ki, Elyar Əliyev idarə etdiyi "Opel" markalı avtomobillə 3 piyadanı vurub. Onlardan ikisinin xəsarəti yüngül olduğundan hadisə yerində ilkin tibbi yardım alıb. Vəziyyəti ağır olan digər yaralı isə YPX müfəttişləri tərəfindən Respublika Klinik Xəstəxanasına çatdırılıb.

Hazırda yol qəzasının təfərrüatları araşdırılır.