Xalq yazıçısı Elçinin dramaturgiyası xarici ölkələrin teatrlarında tez-tez tamaşaya qoyulur və get-gedə beynəlxalq səviyyədə daha geniş miqyaslı populyarlıq əldə edir.
Onun pyesləri əsasında Nyu-York, London, Roma, İstanbul, Ankara, Moskva, Peterburq və başqa şəhərlərin teatrlarında hazırlanmış tamaşalar rəğbətlə qarşılanmış, müasir dramaturgiyanın uğurları kimi qiymətləndirilib "Cəhənnəm sakinləri" pyesi əsasında ingilis bəstəkarı Lorens Mark Vitin yazdığı müzikl isə Cənubi Koreyada, Seul Opera və Balet teatrında böyük müvəffəqiyyətlə tamaşaya qoyulub.
Bugünlərdə isə Almaniyada "Pemverlaq" nəşriyyatı Xalq yazıçısının "Pyeslər" ("Teatr oyunları") kitabını nəfis şəkildə nəşr edib. Kitaba ədibin məşhur "Teleskop", "Mənim sevimli dəlim", "Şekspir" və "Cəhənnəm sakinləri" tragikomediyaları daxildir. Pyesləri orijinaldan alman dilinə türkoloq K.H.Kiel tərcümə edib. Maraqlı cəhət odur ki, nəşriyyat həmin pyesləri eyni zamanda, türk dilində də ayrıca kitab kimi buraxıb. Əsərləri türk dilinə Orxan Aras çevirib. O, kitabı oxuculara təqdim edərək yazır: "Dünyaca tanınmış yazar Elçin, sadəcə çağdaş dövrümüzdə deyil, gələcəkdə də oxunacaq və əsərlərindən dərslər alınacaq bir yazardır".
Qeyd etmək lazımdır ki, alman oxucusu Xalq yazıçısı Elçinin əsərləri ilə yaxşı tanışdır. Almaniyada onun "Mahmud və Məryəm", "Ağ dəvə", "Ölüm hökmü", "Baş" romanları, eləcə də povest və hekayələri nəşr edilib. "Pyeslər" onun Almaniyada nəşr olunmuş səkkizinci kitabıdır.
çap et