AMEA-nın elmi-tədqiqat müəssisələrində direktor vəzifəsini tutmaq üçün elan edilmiş seçkilərə sənəd qəbulu başa çatıb.
Bu barədə APA-ya AMEA-nın akademik-katibi, Elm və təhsil baş idarəsinin rəisi Əminağa Sadıqov məlumat verib.
Onun sözlərinə görə, direktor vəzifəsinə namizədlərlə bağlı məlumatlar əvvəlcə müvafiq bölmələrdə yaradılan ekspertiza komissiyalarında təhlil olunacaq:
“Bu məlumatlar tam araşdırıldıqdan sonra tanış olmaq üçün bölmə üzvlərinə təqdim ediləcək. Bundan sonra AMEA-nın bölmələrində seçki təyin olunacaq. Hazırda AMEA-da məzuniyyət dövrü başlayıb. Buna görə müvafiq bölmələr üzrə seçkilər sentyabr-oktyabr aylarında keçiriləcək. Daha sonra bölmələrdəki seçkilərin nəticələri AMEA Rəyasət Heyətində müzakirə olunacaq və yekun qərar veriləcək”.
Qeyd edək ki, AMEA-nın elmi-tədqiqat müəssisələrində direktor vəzifəsini tutmaq üçün sənəd qəbulu iyunun 11-dən iyulun 11-dək aparılıb.
AMEA-nın elmi-tədqiqat müəssisəsinin direktoru vəzifəsinə namizədlər yüksək elmi nailiyyətləri, elmi-təşkilati bacarığı olan alimlər sırasından müvafiq bölmənin bürosu, AMEA-nın həmin bölmədən olan üzvləri və ya həmin elmi müəssisənin elmi şurası tərəfindən irəli sürülə bilər.
Vakansiya olan elmi-tədqiqat müəssisələri aşağıdakılardır:
Fizika-Riyaziyyat və Texnika Elmləri Bölməsi üzrə:
Fizika İnstitutu
İdarəetmə Sistemləri İnstitutu
Riyaziyyat və Mexanika İnstitutu
İnformasiya Texnologiyaları İnstitutu
Biofizika İnstitutu
Kimya Elmləri Bölməsi üzrə:
Akademik Murtuza Nağıyev adına Kataliz və Qeyri-üzvi Kimya İnstitutu
Akademik Əli Quliyev adına Aşqarlar Kimyası İnstitutu
Yer Elmləri Bölməsi üzrə:
Geologiya və Geofizika İnstitutu
Biologiya və Tibb Elmləri Bölməsi üzrə:
Akademik Abdulla Qarayev adına Fiziologiya İnstitutu
Mərkəzi Nəbatat Bağı
Humanitar Elmlər Bölməsi üzrə:
Nizami Gəncəvi adına Ədəbiyyat İnstitutu
Məhəmməd Füzuli adına Əlyazmalar İnstitutu
Nizami Gəncəvi adına Milli Azərbaycan Ədəbiyyatı Muzeyi
Hüseyn Cavidin Ev Muzeyi
İctimai Elmləri Bölməsi üzrə:
Fəlsəfə İnstitutu
Milli Azərbaycan Tarixi Muzeyi
Akademik Ziya Bünyadov adına Şərqşünaslıq İnstitutu