“Azərbaycanda son illərin ən yaxşı inkişaf göstəriciləri məhz 2019-cu ilin arxada qalan dövründə qeydə alınıb”.
APA-nın xəbərinə görə, bunu deputat Hikmət Babaoğlu parlamentin bu gün keçirilən plenar iclasında büdcə müzakirələri zamanı deyib.
Deputat bildirib ki, gələn il üçün büdcə layihəsində təqdim olunan proqnozlar ölkəmizin sosial-iqtisadi inkişaf dinamikasına adekvatdır.
“2020-ci ilin dövlət büdcəsi Azərbaycanın müstəqillik tarixində ən irihəcmli büdcədir. Sənəddə 2020-ci il dövlət büdcəsinin gəlirləri nominal ifadədə 24 milyard 135 milyon manat nəzərdə tutulub. Başqa sözlə desək, dövlət büdcəsinin gəlirləri ümumi daxili məhsulun 29 faizi həcmində olacaq. Müqayisə etsək, görərik ki, 2020-ci ilin dövlət büdcəsi cari ilin büdcəsindən 967 milyon manat və ya 4,2 faiz çoxdur. Eyni zamanda, 2020-ci il dövlət büdcəsinin xərcləri ümumi daxili məhsulun 32,3 faizi səviyyəsində və ya 26 milyard 914 milyon manat nəzərdə tutulur ki, bu da cari illə müqayisədə 1 milyard 724 milyon manat və ya 6,8 faiz artım deməkdir”, - deyə o bildirib.
Deputat deyib ki, dövlət büdcəsinin gəlirlərinin tərkibində neft gəlirləri 56,1 faiz və ya 13,5 milyard manat, qeyri-neft gəlirləri 43,9 faiz və ya 10,6 milyard manat nəzərdə tutulur: “Prezident İlham Əliyevin siyasi iradəsi əsasında milli iqtisadiyyatımızda ağırlıq mərkəzinin tədricən neftdənkənar sahələrə keçirilməsinə hesablanan məqsədyönlü tədbirlər görülüb. 2020-ci il üçün dövlət büdcəsinin sosialyönümlü xərcləri 10,4 mlrd. manat məbləğində proqnozlaşdırılıb ki, bu da 2019-cu illə müqayisədə 2605,8 mln. manat və ya 33,5 faiz çoxdur. Sosialyönümlü xərclərin dövlət büdcəsi xərclərinin tərkibində xüsusi çəkisi 2019-cu illə müqayisədə 7,7 faiz bənd çox olmaqla 38,5% təşkil edəcək. Növbəti ilin büdcə layihəsində də sosial sfera üçün nəzərdə tutulan vəsaitin həcminin artırılmasının proqnozlaşdırılması bütövlükdə Azərbaycan dövlətinin özünün sosial siyasətinə sadiqliyini bir daha təsdiqləyir”.
çap et