Əli CƏFƏROĞLU (ƏLİYEV)
Azərbaycan Yazıçılar Birliyinin üzvü
Ağstafa rayon Təhsil Şöbəsinin aparıcı məsləhətçisi
Təbiətdən qüdrətli sənətkar yoxdur.
lll
Azadlığın təntənəsi naminə tökülən qan halaldır.
lll
Saniyənin qüdrəti olmasaydı, əsrlər yaratmazdı.
lll
Coşanda xəfif külək fırtına qoparır.
lll
Yaxşılar əməllərini yarımçıq qoyaraq o biri dünyanın harayına tələsir.
lll
İrqi ayrı-seçkilik məhkəməsi keçirilsə, iqlim məhşər ayağına çəkilər.
lll
Mübarizə əlinə qılınc götürəndə Azadlığı səsləyir.
lll
Tənhalıq dahilərin çəkildiyi əbədi sığınacaqdır.
lll
Başsız evdə səfalət yuva qurar.
lll
Söz girməyən qalanı nəğmə fəth edər.
lll
Daş əziyyətdən qurtardığı üçün dəmirə minnətdar olmalıdır.
lll
Nisbilik mütləqliyə meydan oxuyur .
lll
Ölümün dəhşətli qəhqəhəsi xəstəliyin ağır anlarında eşidilir.
lll
Tarix əsrlərin yaddaşı, harayı və lal sükutudur.
lll
Arsız üzdə məsumluq, xəbis ürəkdə sədaqət, əxlaqsızda ismət ola bilməz.
lll
Qılınc və nizə ölkələr, hikmətli sözlər isə könüllər fəth edir.
lll
Məşhur olmaq xoşbəxt olmaq deyil.
lll
Sahil dənizin görüş yeridir.
lll
Səhranı karvan dilə gətirir.
lll
Tənə ikibaşlı olur.
lll
Həqiqəti gözləmək lazım deyil, onu axtarıb tapmaq lazımdır.
lll
Səhvin bir ucu rüsvayçılığa aparır.
lll
Ətalətə imkan verilsəydi, aləmə layla çalardı.
lll
Gülüşlə hörmət qazanılmır.
lll
Tanımadığına bel bağlayan arxadan vurular.
lll
Bəla daim pusqudadır.
lll
Kəsərsiz söz havaya sovrulmuş kül kimidir.
lll
Tarixinə qılınc vuran xeyir tapmaz.
lll
Şam əriyənəcən sevilir.Ondan sonra tərənnüm edilir.
lll
Özgəsinə sığınan özündən məhrumdur.
lll
Gəncliyin göz yaşı da qızıldandır.
lll
Hədsiz itaət köləlik yaradır.
lll
Tənbəlin şöhrəti laqeydliyindədir.
lll
Ən nazik boyun kölə boynudur.
lll
Həqiqətin iki əli var: biri qılıncdır, o biri qalxan.
lll
Qorxağın məhəbbəti döyülüncədir.
lll
Ac gözlər yırtıcıdan da qorxuludur.
lll
Qandan çəkinən ya müdrikdir, ya qorxaq.
lll
Kin gözlərdə qaynayır, xəbislik ürəkdə.
lll
Ürək zəngin xəzinədir, açdıqca açılır.
lll
Siyasət binasının çıxış qapıları yoxdur.
lll
Cəhalət dünyasının da öz ulduzları var.
lll
Güc çox şeydir, ağıl hər şey.
lll
Xəyanətin gözləri həmişə bulanıqdır.
lll
Tərif yatırdar, tənqid ayıldar.
çap et