Bu günlərdə 78 yaşını qeyd edən görkəmli elm xadimi, müəllim və jurnalist Cahangir Məmmədli ilə blits müsahibə
- Bir çox titullara malik Cahangir Məmmədli özü-özünü necə təqdim edərdi?
- Ömrünün bu ahıl çağında Qarabağ, Novruzlu dərdi yaşayan bir zavallı kimi.
- Sizi hansı müğənni konsertinə cəlb edə bilər?
- Mənsum İbrahimov, Alim Qasımov və Emin Ağalarov.
- Dünənin və bu günün jurnalistikası: hansına üstünlük verərdiniz?
- Bu günün jurnalistikası dünənki jurnalistikanın imitasiyasıdır.
- Bədii ədəbiyyata güclü meyli olan bir adam kimi hansı yazıçını ustad hesab edirsiniz?
- Altmışıncıların hamısını.
- Jurnalist tələbələr üçün, onların əsl peşəkar kimi yetişəcəyinə kömək edə biləcək hansı dərsliyi məsləhət görərdiniz?
- O dərslik hələlik yazılmayıb.
- Ömrünüzün yarıdan çoxunu Bakı Dövlət Universitetində keçirmisiniz. Bu universitetin dünəni və bu gününü necə müqayisə edərdiniz?
- Bu universitet dünən də, bu gün də mənim üçün müqəddəs bir məkandır - bütün uğurları və kəm-kəsirləri ilə.
- Metro qatarından istifadə edirsinizmi, orada yeni nə görürsünüz?
- Əvvəllər metro qatarında "Klimat" ətrinin qoxusu vardı, indi bu qoxu avtomobillərə köçüb.
- Atalar sözünə necə baxırsınız?
- Mən ataları öz sözündə həmişə uzaqgörən görmüşəm, amma "Yazıya pozu yoxdur" məşhur deyimi indi öz dəqiqliyini itirdi, çünki internet sübut elədi ki, yazıya da pozu var.
- Kitab, yoxsa internet?
- Müqəddəs kitablar qeybdən gəldi, kitaba sevgi də bir gün yenidən qeybdən gələcək.
- Telekanallarda sizə maraqlı gələn ən böyük yenilik?
- İnformasiyanı internetdən köçürüb "özününküləşdirmək".
- "Səhnədə divardan tüfəng asılıbsa, tamaşanın sonunadək mütləq açılmalıdır". Doğurdanmı?
- Bəli, bu, bir həqiqətdir - amma yeni variantda: güc dövlətləri nüvə silahını harasa yerləşdiriblərsə, o, mütləq haçansa işə salınmalıdır.
- Orta məktəb, universitet, aspirantura... ən böyük müəlliminiz kim oldu?
- Kitablar və onları mənə sevdirən Şirməmməd Hüseynov
- Ən maraqlı yazılarınızı harda yazırsınız?
- Metro qatarında və bir də uzaq yolu tək getdiyim avtomobilin sükanı arxasında
- Bala şirindi, yoxsa nəvə?
- Kimsə etiraf etməyə bilər, amma nəvəyə sevgi baladan gəlir.
- İndi dəbə minmiş bir sual: Lirika, yoxsa fizika?
- Fizikanı tarixən lirikaya qurban verməyimiz bizi asılı vəziyyətə gətirib çıxarıb.
- Nağıllar gerçək ola bilərmi?
- Əgər bu dünya özü elə nağıldırsa, suala müsbət cavaba ehtiyac qalmır
- Allahmı, təbiətmi insana uzağı yüz illik bir ömür verir, az deyil ki?
- Allahmı, təbiətmi hər şeyi dəqiq hesablayır. İraq olsun, insana həddindən artıq ömür verilsəydi, paxılların, vicdansızların əlindən dünya zinhara gələrdi.
- Paxıllıq nədir?
- Alçaq insanın xisləti.
- Şəhər, yoxsa kənd?
- İnsana gərək olan üç mühüm şey - hava, su, çörək - bunların üçünün təbiisi az-çox indi yalnız kənddədir.
- Xarakterinizdə sizi ən çox narahat edən nə var?
- Heç kimə, heç nəyə inanmamağım.
- Texnologiyanın bu sürətlə inkişafı bizə nə vəd edir?
- İnfantillik.
- Ən çox sevdiyiniz söz?
- "Söz" sözünün özü.
- Azərbaycan ədəbiyyatında ən çox sevdiyiniz əsər?
- Anarın "Mən, sən, o və telefon" hekayəsi.
- Xatirələrinizdə ən çox kök salan hadisə?
- Şuşanın bir yay günündə IV kurs tələbəsinin onuncu sinif şagirdini gördüyü an.
- Nə ilə yazmağı xoşlayırsınız - qələm, yoxsa kompüter?
- Qələmlə, çünki Qurani-Kərim qələmlə yazılıb və qələm müqəddəs anlayışdır.
- Aristofana görə, "Ən yaxşı mükafat insanın daxilinin rahat olmasıdır", daxilən rahatsız?
- Narahatlığa səbəb olan onlarca fakt rahatlığa imkan vermir.
- İğtişaşların, terrorun, qətllərin, nüvə təhdidlərinin gündəlik hal aldığı bir zamanda, sizcə, dünyanı nə xilas edəcək?
- Məşhər ayağına az qalıb. Bütün pislikləri məhv edib dünyanın yenidən yaranması məşhərdən başlayacaq.
- Lələ köçüb, yurdunda kim qalıb?
- Qaçqın və köçkün dünyasında yurdda kimsə qalmayıb.
- Peşmanlıq hissi sizin üçün nə ifadə edir?
- Etiraf və peşmançılıq güc əlamətidir.
- Keçmişə qayıtmaq şansınız olsaydı, nəyi təkrar etməzdiz və ya edərdiniz?
- Şəhər həyatına düşmək istəməzdim. MDU-da oxuyardım.
- Cahangir Məmmədli üçün xoşbəxtlik nədir?
- Bu suala ən yaxşı cavab xalq deyimindədir: İçi məni yandırır, çölü özgəni.
- Ən çox kimə inanırsız?
- Heç kimə. Ümidim Allahadır.
- Necə düşünürsünüz: yaxşı jurnalist olmaq Tanrının bəxş etdiyi istedad sayəsindədir, yoxsa buna zəhmətlə nail olmaq olar?
- Bir Türkiyə nəzəriyyəçisinin sualıdır: "Jurnalist doğulurmu, olurmu?" Tanrı vergisi olsa, ona zaval yoxdur.
- Ürəyinizdə həyata keçirə bilmədiyiniz arzunuz qalıbmı?
- Bütün arzularımın üstündən bir xətt çəkib yalnız "Qarabağ" sözünü saxlamışam.
Müsahibəni yazdı: Esmira RÖVŞƏN