Dövlət İmtahan Mərkəzində ingilis dili üzrə beynəlxalq imtahanlar keçirilib

Dövlət İmtahan Mərkəzində (DİM) ingilis dili üzrə növbəti beynəlxalq imtahanlar keçirilib. İmtahanların gedişi zamanı iştirakçıların bacarıqlarını nümayiş etdirmələri üçün zəruri şərait yaradılıb.

DİM-dən AZƏRTAC-a bildirilib ki, bu həftə ərzində 5 nəfər (1 yerli və 4 əcnəbi) “Pearson Test of English Academic” (PTE-Academic/PTE-A) imtahanını verib. Akademik ingilis dili üzrə bilik və bacarıqların qiymətləndirilməsini nəzərdə tutan 3 saatlıq onlayn imtahanda iştirakçıların oxu, yazı, dinləmə və ünsiyyət bacarıqları yoxlanılıb. “Ən tez və ədalətli” (fast&fair English test) sayılan PTE-A imtahanının nəticələri 1-2 iş günü ərzində onlayn şəkildə elan edilir və 60-dan çox ölkənin müxtəlif ali təhsil müəssisələrində qəbul edilir.

2017-ci ildən etibarən “Pearson VUE” təşkilatının rəsmi kompüter əsaslı test mərkəzi olan Dövlət İmtahan Mərkəzinin saytında ingilis dili və müxtəlif ixtisas sahələri üzrə imtahanlar haqqında ətraflı məlumat verilib.

Qeyri-iş günləri imtahanlar keçirilmir.