525.Az

Türk qardaşlarımızdan birlik mesajları


 

Türk qardaşlarımızdan birlik mesajları<b style="color:red"></b> "İşğalçı Ermənistanın hərbi birləşmələri Azərbaycanın Tovuz rayonu istiqamətindən iyulun 12-dən başlayaraq növbəti dəfə təxribatlara əl atıb. Hər zaman ayıq-sayıq olan Silahlı Qüvvələrimizin bölmələri artıq bir neçə gündür ki, düşmənə tutarlı cavablar verərək böyük itkilərlə düşməni geri otuzdurur. İşğalçı Ermənistanın təxribatlarına qarşı mübarizə aparan ölkəmizə isə ilk dəstək yenə də məhz qardaş Türkiyədən gəlib. Qardaş ölkə rəsmiləri açıq-aşkar Azərbaycanın yanında olduqlarını bildirib, düşməndən “ağlını başına toplamağı” sərt şəkildə tələb ediblər".

Bu sözləri mətbuata açıqlamasında Tərxis Olunmuş Hərbçilərin Gəncləri Maarifləndirmə İctimai Birliyinin sədri Emin Həsənli deyib.

E.Həsənlinin sözlərinə görə, bu əsl qardaşlıq və həmrəylik nümayişidir:
 
“Türkiyə Prezidenti Rəcəb Tayyib Ərdoğan, Xarici İşlər naziri Mövlud Çavuşoğlu, Türkiyə Milli Müdafiə naziri Hulusi Akar və qardaş ölkənin digər rəsmilərinin Azərbaycana verdikləri dəstəyə dünyanın dörd bir yanında olan türk qardaşlarımız da qoşulub. Qeyd edək ki, tarixi köklərə bağlı olan Azərbaycan-Türkiyə münasibətləri hər bir sahədə olduğu kimi vətəndaş cəmiyyəti inistutları səviyyəsində də möhkəmlənir, davamlı olaraq inkişaf edir”.

O əlavə edib ki, Tərxis Olunmuş Hərbçilərin Gəncləri Maarifləndirmə İctimai Birliyi artıq bir neçə ildir ki, qardaş ölkənin qeyri-hökümət təşkilatları, xüsusilə də hərbi yönümlü QHT-lərlə sıx əməkdaşlıq edir, qarşılıqlı səfərlərlə əlaqələrin möhkəmləndirilməsi üçün birgə fəaliyyətlər həyata keçirir:

“İşğalçı Ermənistanın təxribatlarına qarşı aparılan mübarizəyə dəstək vermək məqsədilə əməkdaşlıq etdiyimiz qardaş ölkənin ən böyük hərbi yönümlü təşkilatları - Türkiyə Təqaüddə olan Zabitlər Birliyi, Türkiyə Müharibə Veteranları Birliyi, Türkiyə Müharibə Əlilləri, Şəhid, Dul və Yetimlər Birliyi, Türkiyə Təqaüddə olan Gizirlər Birliyi, eləcə də Türkiyə Aydınlar Ocağı, Anadolu Aydınlar Ocağı, Türkiyə Milliyətçi Həkimlər Birliyi, Rumeli Balkan Strateji Araşdırmalar Mərkəzi bizə qardaş Azərbaycan xalqının yanında olduqlarını ifadə edən dəstək məktubları göndəriblər. Şimalı Kipr Türk Cümhuriyyətininin Türk Müqavimət Təşkilatı və şəhid ailələrinin müharibə veteranları və əlillərinin ehtiyatda olan zabitlərin birləşdiyi ictimai birliklər də bizə dəstəklərini ifadə ediblər.

Məktublarda düşmən tərəfin Azərbaycanın Tovuz rayonu istiqamətində  həyata keçirmək istədiyi təxribat şiddətli şəkildə pislənir, edilənlərin beynəlxalq hüquqa zidd olduğu bildirilir, beynəlxalq təşkilatlardan bu məsələdə ədalətli, haqqlı mövqe sərgiləmək tələb olunur. Sonda isə qeyd olunur ki, qardaş Azərbaycan ilə tariximiz, yaşadıqlarımız, şəhidlərimiz, kədərimiz və sevincimiz eynidir. Təxribatlar zamanı şəhid olan Vətən oğullarına Allahdan rəhmət, yaxınlarına səbr diləyən qardaşlarımız hər zaman Azərbaycanın yanında olduqlarını ifadə edirlər”.







 





15.07.2020    çap et  çap et