Sentyabrın 21-də AMEA Nəsimi adına Dilçilik İnstitutu Türk dilləri şöbəsi ilə Türkiyə Respublikası Türk Dil Dərnəyi arasında "Türkcə mətnlərin hərfi və yazılı tərcüməsi" ilə bağlı birgə əməkdaşlıq memorandumu imzalanıb.
Birgə əməkdaşlıqda əsasən, türkcə qədim yazı mətnlərin, əlyazmaların ortaq türk əlifbası ilə transkripsiyası və tərcüməsi, qohum dillərdə tərcümə zamanı ortaya çıxan problemlərin müzakirəsi və həlli istiqamətində addımlar atılması, türkologiyanın və türk dillərinin müasir problemlərinin vahid müstəvidə araşdırılması nəzərdə tutulur.
Bu çərçivədə mütəmadi toplantıların keçirilməsi, müzakirələrin aparılması və müzakirələr haqqında mətbuata maarifləndirici yazıların verilməsi, onlayn iclaslarda oxunan məruzələrin kitab şəklində toplanması və birgə diskussiyalarda əldə edilən nəticələrin çap olunması müqavilədə öz əksini tapıb.
Qeyd edək ki, birgə əməkdaşlıq memorandumunu Azərbaycan tərəfindən Türk dilləri şöbəsinin müdiri, filologiya üzrə fəlsəfə doktoru Elçin İbrahimov, Türkiyə Respublikası tərəfindən Türk Dili Dərnəyinin prezidenti Gökbey Uluç imzalayıb.
çap et