"YARAT" Müasir İncəsənət Məkanının Xaçmaz rayonunda incəsənət həvəskarları üçün təşkil etdiyi "Yenə o bağ olaydı" adlı səyyar sərgisinin vaxtı uzadılıb.
AZƏRTAC xəbər verir ki, sərgi ziyarətçilər üçün noyabrın 27-dək açıq qalacaq.
Sərginin ekspozisiyasında rəssamlar Ağababa Bağırov, Etibar İsmayılov, Günay Əliyeva, Mousa Bəyzadə, Nəzrin Məmmədova, Vüsalə Ağarazıyeva, Leyli Qafarova kimi gənc sənətçilərin və tanınmış italiyalı rəssam Mikelancelo Pistolettonun əsərləri təqdim olunur.
Bununla yanaşı, sərgi Ruslan Abbasov, Günel Axundlu, Rəna Bəşirova, Timo Herbst, Orxan Hüseynov, Mersedes Şturm-Li və Fərid Rəsulovun əsərlərini özündə ehtiva edən videoskrininq proqramı ilə müşayiət olunur. Həmçinin, "YARAT" "Nargis Magazine" ilə birgə əməkdahlıq çərçivəsində "Recycle Project" (2019) layihəsinə daxil olan "Pablik art" proqramını təqdim edir. Burada Rəşad Ələkbərovun "Reuse, Reduce, Recycle" instalyasiyası nümayiş olunur.
çap et