525.Az
“Sovetski” belə olacaq (Fotolar)
Bakının “Sovetski” adlanan ərazisinin gələcək görüntüsü ilə bağlı ilk təklif var.
Dünyanın müxtəlif yerlərində çoxsaylı landşaft və park layihələrinin müəllifi memar Laura Peretti bakupost.az-a bildirib ki, Bakının mərkəzində parkın yaradılması ilə bağlı layihə təqdim edib: “Təklif etdiyimiz layihə bu gün Bakının mərkəzində mövcud olan parklara bənzəmir. Bu, şəhərin səs-küyündən, necə deyərlər, qaçıb gizlənməyə imkan verən əsl təbii parkdır və bu məkan daha çox Nyu-York Mərkəzi Parkına bənzəyir. Mən bu parkı şəhərin yaşıl “ağ ciyərləri”nə bənzədərdim. Çünki həm ahıl adamların, xüsusən böyüməkdə olan nəslin sağlamlağı bizim üçün olduqca qiymətlidir. Dünyanın bəzi ölkələrində şəhərin mərkəzində yaşıllığı məhv edib yerində göydələnlər tikirlər, sizdə isə əksinə, köhnə evlərin yerində ecazkar park salmağa qərar verilib, bu, çox sevindiricidir”.
L. Peretti deyib ki, layihədə həmin ərazidə hər hansı hündür bina inşa olunmayacaq. Amma layihədə Azərbaycanın memarlıq abidələri hesab olunan tikililərin, eləcə də artıq inşasına başlanmış tikililərin qorunub saxlanması nəzərdə tutulur.
Bu layihədə yeganə yeni tikinti Azərbaycan ənənələri ruhunda “Şəbəkə” olacaq: “Bu “Şəbəkə” uzun örtülü iki səviyyəli qalereya şəklindədir, bura geniş parkinq, bar, fitnes klub, uşaqlar üçün oyun meydançaları, mədəniyyət mərkəzləri, mağazalar və digər xidmətlər olacaq. Şəhər və park arasında keçid rolunu oynayan, Alov Qüllələri ilə İnşaatçılar prospektini vizual şəkildə birləşdirən “Şəbəkə” həmçinin Bakının gecə həyatının mərkəzinə çevrilə bilər”.
12.03.2014 
çap et