525.Az
“Naşir” jurnalının yeni sayı
Bu yaxınlarda Azərbaycan Naşirlər və Poliqrafçılar İctimai Birliyinin mətbu orqanı olan “Naşir” jurnalının aprel-may buraxılışı nəşr edilib. “Kitab evi”ndə növbə yarandı” yazısında şair Vaqif Bəhmənlinin “Hamı” və “İşartı”, şair-publisist Rəşad Məcidin “Dəlicəsinə” kitablarının təqdimat mərasimindən bəhs olunur.
Dərginin bu sayında Avrasiya Yazarlar Birliyinin sədri Yaqub Öməroğlu ilə müsahibə verilib.
Görkəmli ədibimiz, Xalq yazıçısı İlyas Əfəndiyevin və tanınmış uşaq şairi Teymur Elçinin nəvəsi, UNESCO üzrə Azərbaycan Milli Komissiyasının birinci katibi Günay Əfəndiyevanın hər iki söz ustadı haqqında söhbəti “İşıq və həyat birləşəndə” müsahibəsində öz əksini tapıb.
“Redaktəsiz” rubrikasında bu dəfə şair Vaqif Bəhmənlinin “Yerdən göyə, göydən yerə – kitab” yazısı verilib: “Qorxma, gözün kor olunca oxu, ayrı bir gözün açılacaq. Dünyanı sona yetirən fəlakət anında hər şeydən öncə kitabxanaların xilası ən doğru seçim olardı. Yalnız bu halda neosivilizasiyalar antik eralarda bizim mövcudluğumuzdan xəbər tuta, məhz unikal təcrübə və dəyərlər hesabına sadəlövh bir zillətlə milyon ilə keçdiyimiz yolu tez bir zamanda adlaya bilərlər. And olsun o məhşər gününə ki, həm də bizim kitablar yeni dünyanı insan əclaflığının təkrarından qoruyacaq...”
“Şair babanın yazar nəvəsi” müsahibəsində Xalq şairi Rəsul Rzanın doğum günü ərəfəsində babası haqqında Günel Anarqızının fikirləri var.
“Diasporamız” bölümündə “Fəxri konsul Fəxrəddin Mirzəyev” yazısı verilib.
Jurnalda təqdim olunan daha bir maraqlı yazı “Həbsxanada yazılan 10 əfsanəvi kitab” haqqındadır.
“Meydandakı “THE BEST” qadınlar” yazısında əsərləri bestsellərə çevrilmiş məşhur xanım yazarlar – Coan Roulinq, Stefani Mayer, Erika Ceyms, Syuzen Kollinz, Jillian Flinn, Silviya Dey, Veronika Rot, Kassandra Kler haqqında məlumatlar təqdim edilib.
“Mark Tvenin “macəraları” yazısında Nərmin Nöqtə görkəmli yazıçının ömür və yaradıcılıq yoluna işıq tutub. Yazıda həmçinin Mark Tvenin həyat təcrübəsindən qaynaqlanan məsləhətlər oxucuların diqətinə çatdırılıb: “Dünyanın sənə borclu olduğunu heç kəsə bəyan etmə, çünki onun sənə heç bir borcu yoxdur. O, səndən əvvəl də mövcud olub./ Özünü ruhlandırmağın ən yaxşı üsulu başqasının ruhlandırmağa cəhd etməkdir./ 20 il sonra sən etdiklərinə görə deyil, etmədiklərinə görə təəssüflənəcəksən. Ona görə də lövbəri qaldır və sakit limandan uzaqlaş. Yelkənin arxasından əsən küləyi yaxala. Arzu tut. Açılışlar et”.
Dilqəm Əhmədin “İki dostun “Qeyrət”i yazısında Mirzə Cəlil və Ömər Faiq Nemanzadə haqqında məlumatlar və müəllifin mülahizələri qələmə alınıb.
“Naşir”in budəfəki qonağı tarix elmləri doktoru Fərid Ələkbərli Vatikan arxivlərindəki araşdırmalarından söhbət açıb.
Filologiya üzrə fəlsəfə doktoru Lalə Həsənovanın bəraət sənədləri haqqında yazısı da “Naşir”in bu sayında işıq üzü görüb.
Roald Dalın “Çippendeylin dördüncü komodou” Sevinc Nuruqızının tərcüməsində oxucuların ixtiyarına verilib.
“Amerikanı riqqətə gətirən kamançaçı” – İmamyar Həsənovla söhbət də dərgidə çap olunub.
Professor Səlahəddin Xəlilov “Naşirlik məsuliyyəti” yazısında nəşriyyatların öz ali məramına doğru yüksəlişi qənaətində olduğunu vurğulayıb.
Jurnalda Simona de Bovuarın Nellson Alqrenə, Aqness fon Kirovskinin Ernest Heminqueyə, Virciniya Vulfun əri Leonard Vulfa yazdığı məktublar “Ayrılıq məktubları” başlığında yer alıb.
Azərbaycan Yazıçılar Birliyinin katibi Rəşad Məcid “Milanda duyduğum qürur hissi” yazısında bu ilin fevralında İtaliyaya səfəri zamanı aldığı zəngin təəssüratı oxucularla bölüşüb: “Milanda keçirdiyimiz ikigünlük tədbirlərdə iştirakımız zamanı böyük qürur hissi yaşadıq. Milan kimi qədim mədəniyyət mərkəzində Azərbaycan kitabının nəşri və möhtəşəm təqdimatı bütövlükdə ədəbiyyatımızın uğurudur. Daha bir uğur da odur ki, həmin tədbirlər İtaliya mediasında da geniş şəkildə işıqlandırıldı. Hesab edirəm ki, biz də öyrənməli və kitabın təbliğatında bu cür məqamlardan istifadə etməliyik”.
Dizayner, fotoqraf Fəxriyyə Məmmədovanın düşüncələri “İkisi birində: həm fotoqraf, həm rəssam” yazısında təqdim olunub.
Jurnalda güzgünün mistikası, qiymətli daşlardan firuzə, çiçəklərdən bənövşə ilə, eləcə də insanın enerji çakraları ilə bağlı maraqlı materiallar verilib.
Sevinc MÜRVƏTQIZI
09.05.2014 
çap et