Ailənin üzvü Aidə Şirinovanın 525.az-a verdiyi məlumata görə, qara maskalı beş nəfərdən ibarət silahlı dəstə evə basqın edərək ailə üzvləri – Yasin Şirinov, Nargül Şirinova, Azər Şirinov, Xəyalə Şirinova və iki azyaşlı uşağın ağız və əl-qollarını bağlayaraq onlara bədən xəsarətləri yetirərək pul və qızıl əşyalar tələb ediblər.
“Silahlı dəstə ailə üzvlərinə amansız işgəncələr veriblər. Ailə başçısı 68 yaşlı Yasin Şirinov və xanımı Nargül Şirinovaya avtomatın qundağı ilə başından, oğulları Azər Şirinova isə çənə nahiyəsindən ağır zərbələr vurulmuşdur. Evin gəlini Xəyalə Şirinovaya da ağır işgəncələr verilib. Oğru dəstənin üzvü onun boynuna rezin şlanq keçirərək sürümüş, ondan pulların yerini deməyi tələb edib. Dəstə üzvləri evin gəlinindən ütünün harda olmasını xəbər alıb. Məqsəd ütünü yandırıb ailə üzvlərinə işgəncə vermək olub”, - A. Şirinova bildirib.
Onun sözlərinə görə, silahlı dəstə evdən 300 lari məbləğində pul və xeyli qızıl əşyalar aparıb. “Silahlılar o qədər amansız olublar ki, hətta kiçik uşaqların ağızlarını skoçla bağlayıblar. Oğru dəstə evi tərk edəndə kiçik yaşlı qızın qulağında olan qızıl sırğanı da açıb götürüblər”, - A. Şirinova deyib. Şirinovanın sözlərinə görə, bu cür hadisə birinci dəfə deyil ki, baş verir. “Son aylar ərzində Gürcüstanın azərbaycanlı kəndlərində artıq bir neçə ailəyə silahlı basqın edilərək evləri yarılıb. Çox güman ki, basqını eyni dəstə törədir. Bütün kənd sakinləri qorxu içərisində yaşayır və bu cür hadisənin təkrarlanacağından narahatdırlar”, - o deyib. Şirinova cinayət hadisəsinin üstünün açılacağına ümid etmədiklərini bildirib.
“Kənddə son illər ərzində bir neçə cinayət hadisəsi törədilib və bu günəqədər heç birinin üstü açılmayıb. Silahlı basqınların azərbaycanlıları Gürcüstandan sıxışdırmaq məqsədilə törədilir. Silahlı basqınları həmçinin Gürcüstanda oktyabrın 1-də keçirilmiş parlament seçkiləri və yeni hökumətin yaradılması ilə də bağlı ola bilər”, - o deyib. Şirinova törədilmiş cinayət hadisəsi ilə bağlı Bolnisi rayonunun baş polis idarəsində istintaq aparıldığnı bildirib. “Ailə üzvlərimiz ciddi stress keçirib, onlara ilkin tibbi yardım göstərilib, vəziyyətləri orta ağırdır”, - o deyib.
Aidə Şirinova Gürcüstanda fəaliyyət göstərən diaspor təşkilatlarının və Azərbaycan televiziyalarının regional müxbirlərindən narazılıq ifadə edib. “İctimai Televiziyanın Gürcüstan müxbiri Təhməz Təhməzova zəng vurub hadisəni işqılandırmağı xahiş etsək də, o, çəkilişə icazənin olmadğını deyib. O bildirib ki, çəkiliş üçün Azərbaycanın Gürcüstandakı səfirliyinin və ya polisin icazəsi lazımdır. Nə vaxtdan çəkiliş üçün icazə tələb olunur? Təhməz Təhməzov hadisədən sonra xəsarət alanlar polisdən evə qayıdandan sonra çəkiliş aparıb hadisəni işıqlandıra bilərdi”, - o deyib.
