Milli Məclisin deputatı, Ədalət Partiyasının sədri İlyas İsmayılov Azərbaycan Respublikasının Prezidenti İlham Əliyevə məktubla müraciət edib.
Partiyanın mətbuat xidmətindən Modern.az-a daxil olan həmin müraciətdə deyilir:
“Hörmətli cənab Prezident!
Son illərdə, Sizin rəhbərliyinizlə, əhalinin rifah halının yüksəldilməsinə, o cümlədən ölkə regionlarının sosial-iqtisadi inkişafına yönələn addımlar nəzərəçarpan və real nəticələr verməkdədir. Mən bu işdə Sizə və xalqımıza yeni uğurlar arzulayır və bildirirəm ki, bir vətəndaş kimi bu yöndə səylərinizi hər zaman dəstəkləməyə hazıram.
Cənab Prezident! Bu müraciətimlə Sizin diqqətinizi həllini vacib saydığım bir məsələyə cəlb etmək istərdim. Deputat seçildiyim dairə ölkəmizin Ermənistanla birbaşa həmsərhəd bölgələrini əhatə edir. Sərhəd zolağında, düşmən tərəfdən vaxtaşırı atəşə tutulan ərazilərdə onlarla yaşayış məntəqəsi yerləşir, minlərlə soydaşımız orada tikir, qurur, əkib-becərir, övlad böyüdür. Misal kimi, may ayının sonlarında seçicilərimlə görüşə getdiyim Tovuz rayonunun Hacıallar kəndini göstərə bilərəm. Bu kəndin sakinləri sərhəd bölgəsində, Ermənistanla təmas xətti yaxınlığında yaşayır və davamlı olaraq düşmən atəşinə məruz qaldıqlarını bildirirlər. Müşahidələrim və sakinlərlə apardığım söhbətlər də göstərir ki, əhali doğrudan da düşmənin atəş zonasında, risk altında yaşayır, torpaqdan faydalanmaqda çətinlik çəkir, əsas fəaliyyətləri olan əkinçilik və heyvandarlıqla lazımi səviyyədə məşğul ola bilmir. Bu isə son nəticədə onların gəlirlərinin azalmasına səbəb olur və həyat şəraitlərinə mənfi təsir göstərir.
Məhz ona görə görüşə gələnlər bir səslə atəş bölgəsində qeyri-normal şəraitdə yaşadıqlarını nəzərə alaraq, istifadə etdikləri elektrik enerjisinin və təbii qazın dəyərinin ödənilməsindən qismən azad olunmalarını və ya büdcədən müəyyən kompensasiyanın ayrılmasını xahiş edirdilər. Düşünürəm ki, onların xahişləri əsaslıdır və bu cür riskli şəraitdə yaşayan soydaşlarımıza müəyyən güzəştlərin tətbiq edilməsi dövləti maraqlarımıza da tam uyğun olardı. Onu da qeyd etmək istəyirəm ki, bütün çətinləklərə baxmayaraq, insanlarımız ata-baba yurdlarını tərk etmək, digər bölgələrə köçmək istəmirlər və zənnimcə, bu, təqdirəlayiq bir mövqedir.
Dünyada buna oxşar vəziyyətlər az deyil. Yəni, hətta aralarında, hərbi münaqişədən sonra, atəşkəs rejimi olan dövlət və bölgələrdə sərhəd zonasında yaşayan əhali üçün müəyyən stimul və güzəştlər tətbiq olunur. Məsələn, Qəzza bölgəsi ilə təmas zolağında yaşayan əhali üçün İsraildə xüsusi “Sderot qanunu” qəbul edilib. Bu qanuna əsasən, təmas xəttindən 7 kilometr məsafəyədək yerləşən yaşayış məntəqələrinin əhalisi vergi, rüsum, investisiya, səhiyyə, mədəniyyət və təhsil məsələlərində güzəştlərə malikdir.
Məndə olan məlumata görə, Gürcüstan hökuməti də Cənubi Osetiya və Abxaziya ilə həmsərhəd yaşayış məntəqələri üçün stimul və güzəştlər sistemi hazırlamaqdadır.
Nəzərə alsaq ki, təkcə birbaşa Ermənistanla sərhəddə yox, onların zəbt etdikləri torpaqlarımızla sərhəddə də kifayət qədər əhalimiz yaşayır, torpaqlarımız düşmən işğalından tam təmizlənənə qədər əhalinin bu kateqoriyası üçün stimulların yaradılması zəruri hesab oluna bilər.
Cənab Prezident! Məsələnin sistemli həlli üçün təklif edirəm ki, tərəfinizdən 27 fevral 2014-cü il tarixli Fərmanla təsdiq edilmiş və növbəti beşilliyi əhatə edən Azərbaycan Respublikasi regionlarinin 2014-2018-ci illərdə sosial-iqtisadi inkişafi Dövlət Proqramına Ermənistanla sərhəd və cəbhəyanı bölgələrinin inkişafına dair ayrıca bir bənd əlavə edilsin. Bu bölgələrə aid yaşayış məntəqələrində infrastrukturun yaxşılaşdırılması məsələləri ön plana çəkilsin, orada yaşayan vətəndaşlarımızın döğma yurdlarını tərk etməməsi üçün stimul və güzəştlər sisteminə yenidən baxılaraq, konkret və tutarlı tədbirlər əlavə edilsin”.
çap et