525.Az

“Nizami” Kino Mərkəzində “Carçıfilm” Günləri başladı


 

“Nizami” Kino Mərkəzində “Carçıfilm” Günləri başladı<b style="color:red"></b>

İctimai Televiziya və Radio Yayımları Şirkətinin “Carçıfilm” Yaradıcılıq Birliyi Mədəniyyət və Turizm Nazirliyi ilə birgə Teleradio işçilərinin peşə bayramı ərəfəsində “Nizami” Kino Mərkəzində “Carçıfilm” Günləri keçirir.
 
Bu barədə 525.az-a “Carçıfilm” Yaradıcılıq Birliyinin direktoru, əməkdar jurnalist Qərənfil Xəlilova məlumat verib.  Noyabrın 1-dən 5-dək davam edəcək “Carçıfilm” günlərində yaradıcılıq birliyinin istehsal etdiyi bədii və sənədli filmlər nümayiş olunacaq. Direktorun sözlərinə görə, bu gün – noyabrın 1-də, saat 11:00-da “Nizami” Kino Mərkəzində layihənin açılış mərasimidir. Tədbirdə İctimai Teleradio Şirkətinin, Mədəniyyət və Turizm Nazirliyinin, Kinostudiyanın, digər kino, teatr, təhsil, mədəniyyət strukturlarının, ictimai təşkilatların nümayəndələri, tanınmış rejissorlar, aktyorlar, operatorlar iştirak edəcək. Açılış mərasiminə gələnlər “Carçıfilm”in fəaliyyətinə həsr olunmuş filmə tamaşa edəcəklər. Elə həmin gün şair-yazıçı Ramiz Rövşənlə quruluşçu rejissor Cavid Təvəkkülün “Carçıfilm”də istehsal edilən “Səhərə inan” filmi nümayiş etdiriləcək.

 

Qərənfil Xəlilovanın sözlərinə görə, İctimai Televiziya və Radio Yayımları Şirkəti yarandığı ilk vaxtlardan “Carçıfilm” fəaliyyətə başlayıb: “İndiyədək 200-dən artıq bədii, sənədli film, teleserial, reklam çarxı çəkərək tamaşaçıların ixtiyarına vermişik. Şirkətimizin rəhbəri İsmayıl Ömərovun müəllifi olduğu bu layihə çərçivəsində həmin filmlərdən 14-ü seçilib nümayiş etdiriləcək.  Düşünürəm ki, bu müddət ərzində deməyə sözümüz olub. Doğrudur, biz televiziya vasitəsilə də bu filmləri tamaşaçılara göstərmişik. Amma onda tamaşaçı bizi görüb, biz isə onları yox. İndi isə bu layihə nəticəsində tamaşaçımızla birbaşa ünsiyyət qurmağa nail olacağıq. Onların təşəkkürlərini, iradlarını birbaşa öz dillərindən eşitmək imkanı əldə edəcəyik. “Carçıfilm”dən nə gözlədiklərini, ekranda nələrə tamaşa etmək istədiklərini özlərindən eşidəcəyik. Teleradio işçilərinin peşə bayramı ərəfəsində tamaşaçılarımız bu layihəni hesabatımız kimi qəbul edə bilərlər”. 

 

Qeyd edək ki, layihə çərçivəsində  “Nizami” Kino Mərkəzində gün ərzində 3 seans olmaq şərtilə “Carçıfilm”in –“Fosfor adam”, “Azarkeş”, “Əzizim Fellini”, “Sovqat”, “Səhərə inan...”, “Gəl təzədən evlənək”, “Qovğalı kəndinin gecələri”, “Yanlış da bir naxışdır” filmləri nümayiş etdiriləcək. Seanslara giriş pulsuzdur.

 

S.MÜRVƏTQIZI

 

 




01.11.2012    çap et  çap et