525.Az
“Qarabağ Muğam Mərkəzinin fəaliyyəti daim diqqət mərkəzindədir”
Üzeyir Hacıbəyli adına Qarabağ Muğam Mərkəzi nəinki Ağcabədi rayonunda, bütövlükdə, Qarabağ regionunda muğam ifaçılığı sənətinin inkişafında, əhalinin asudə vaxtının və istirahətinin səmərəli təşkilində mühüm rol oynayan mədəniyyət mərkəzlərindən hesab olunur. Burada müntəzəm olaraq geniş proqramdan ibarət konsert tamaşaları, bayram tədbirləri, muğam ifaçılığı üzrə müsabiqələrlə yanaşı, qələm sahibləri, musiqiçilər, elm adamları ilə görüşlər, yaradıcılıq gecələri, yubileylər, poeziya məclisləri, oxucu konfransları, məktəblilərin şənlikləri, habelə rayon və respublika əhəmiyyətli müxtəlif yığıncaqlar, seminarlar keçirilir. Adıçəkilən Mərkəzin direktoru Tofiq Cəfərovun dediyi kimi, bu yaxınlarda Xalq yazıçısı Anar, Xalq şairi Fikrət Qoca, “525-ci qəzet”in baş redaktoru Rəşad Məcid və Xalq artisti, tanınmış tarzən Ramiz Quliyevlə keçirilən görüşlər bu baxımdan səciyyəvidir.
Qeyd olunub ki, son illər Muğam Mərkəzinin fəaliyyətində ciddi canlanma müşahidə olunur. Cari ilin ötən dövrü ərzində Mərkəzi kollektivinin, “Aysel” uşaq özfəaliyyət ansamblının və rəqs qrupunun iştirakı ilə bayram şənliklərində, cəbhə bölgələrində, ictimai yerlərdə, ümumtəhsil məktəblərində təşkil olunan konsert tamaşaları diqqəti çəkib, böyük rəğbət qazanıb. Mərkəzin şagirdləri müxtəif müsabiqələrə qatılır, uğurlara imza atırlar. Xan Şuşinski adına ikinci respublika uşaq muğam müsabiqəsində şagirdlərdən Zəhra Məmmədova, Arzu Mahmudova, Ceyhunə Tofiqqızı və Nərmin Sultanova fəal iştirak edib, respublika mədəniyyət və turizim nazirliyinin fəxri fərmanlarına layiq görülüblər.
Sözügedən müsabiqənin finalında Muğam Mərkəzinin şagirdi Arzu Mahmudova “Qarabağ şikəstəsi” ifasına görə xüsusi diplomla mükafatlandırılıb. T.Cəfərovun sözlərinə görə, Arzu Mahmudova, Zəhra Məmmədova, Ceyhunə Tofiqqızı və Nərmin Sultanova, həmçinin respublika televiziya muğam müsabiqəsində iştirak etmək hüququ da qazanıblar. Direktor əlavə olaraq qeyd edib ki, rayon icra hakimiyyəti, mədəniyyət və turizim şöbəsinin təşəbbüs və təşkilatçılıqları ilə hər il mayın 25-dən sentyabrın 6-dək Heydər Əliyev adına mərkəzi parkda sakinlərin asudə vaxtlarının və istirahətlərinin səmərəli təşkili məqsədi ilə keçirilən konsert proqramlarında ümumtəhsil məktəbləri şagirdləri ilə yanaşı, Muğam Mərkəzi kolektivinin üzvləri də yaxından iştirak edirlər. Tədbirlərdə Mərkəzin müəllimləri Fəqani Qarayev, Nazim Şirinov, Sahil Quliyev, Şəbnəm Hümbətova və başqalarının böyük əmək sərf etdiyini vurğulayan T.Cəfərov ,ümumilikdə, kollektivin bölgədə və regionda muğamın təbliği sahəsində müstəsna xidmətlər göstərdiyini dilə gətirib.
Qeyd olunub ki, Azərbaycanın birinci xanımı, millət vəkili Mehriban Əliyevanın dəstəyi ilə 2008-ci ildən fəaliyyətə başlayan Üzeyir Hacıbəyli adına Qarabağ Muğam Mərkəzi Heydər Əliyev Fondunun daim diqqət və qayğısı ilə əhatə olunub. Hər il olduğu kimi, bu il də Heydər Əliyev Fondu tərəfindən Muğam Mərkəzinə müxtəlif musiqi alətləri, muğam dərslikləri və albomlar göndərilib. Direktor bu yüksək diqqət və qayğıya görə Heydər Əliyev Fondunun prezidenti Mehriban xanım Əliyevaya kollektiv üzvləri adından səmimi təşəkkürünü və minnətdarlığını bildirib. Söhbət zamanı həmçinin respublika Mədəniyyət Nazirliyi, rayon İcra Hakimiyyəti rəhbərliyinə də minnətdarlıq ifadə olunub. Sonda Tofiq Cəfərov Muğam Mərkəzinin Milli Konservatoriya və Asəf Zeynallı adına musiqi kollecinin tar və kamança siniflərini bitirmiş kadrlara zəruri ehtiyac yarandığını da xüsusi olaraq diqqətə çatdırıb.
Yəhya PAŞAZADƏ
18.08.2014 çap et