Azərbaycan prezidenti İlham Əliyev noyabrın 5-də BMT baş katibinin müavini Vu Honqbonun başçılıq etdiyi nümayəndə heyətini qəbul edib.
525.az-ın prezidentin rısmi saytına istinadən verdiyi məlumata görə, V. Honqbo BMT ilə Azərbaycan arasında əməkdaşlığın yaxşı səviyyədə olduğunu vurğulayıb, 2012-2013-cü illər ərzində Azərbaycanın BMT Təhlükəsizlik Şurasına qeyri-daimi üzv seçilməsi münasibətilə prezident İ. Əliyevi təbrik edib. Azərbaycan hökumətinin informasiya-kommunikasiya texnologiyalarının inkişafına xüsusi diqqət göstərdiyini vurğulayan V. Honqbo ölkəmizin bu sahədə regionun liderinə çevrilməsini yüksək qiymətləndirib. Qonaq BMT-nin “Elektron Hökumət” layihələrində Azərbaycanın fəal iştirakının önəmini qeyd edib.
Öz növbəsində, prezident İ. Əliyev BMT-nin baş katibinin müavininin Bakıda təşkil olunan VII İnternet İdarəçilik Forumunda iştirakının əhəmiyyətini vurğulayıb.
Dövlət başçısı Azərbaycanda informasiya-kommunikasiya texnologiyaları sektorunun prioritet sahələrdən biri olduğunu deyib. Müstəqilliyinin 20-ci ildönümündə güclü beynəlxalq dəstəklə Azərbaycanın BMT Təhlükəsizlik Şurasına üzv seçilməsinin önəmini vurğulayan prezident ölkəmizin 2013-cü ildə də sülhün, təhlükəsizliyin və dostluğun təşviqi işində fəal rol oynayacağına ümidvar olduğunu bildirib. Prezident Azərbaycanla BMT arasında əməkdaşlığın bundan sonra da uğurla inkişaf edəcəyinə əminliyini ifadə edib.