525.Az
Məşhur Yeddilikdən biri və ya birincilərə bayram təbriki
Do,re, mi, fa, sol, lya, si. Bu məşhur yeddiliyi bütün dünya tanıyırdı. Özləri də adları kimi lakonik və kiçik olsalar da. Bu dəfə məktəbə getmək sırası lya notuna çatmışdı. Nə qədər çox əsərlərin not yazısına düşsə də, hələ çox şey öyrənməliydi. Üzeyir bəy ona bu işdə də yol göstərəcəkdi. O biri notlar kimi o da sakit, axıcı, mülayim, arabir stakkato tempində tullana-tullana, hərdən də forte kimi güclü, dəlisov olmağı bacarırdı. Amma yeddisi də birlikdə olanda bu məşhur yeddiliyin pauzası da möhtəşəm olurdu. Sakitlik isə həmişə rahatlıq gətirmir. Bu səssizliyin içində yerinə düşməyən notlar da olurdu. Necə deyərlər, notların belə dostluğundan sui-istifadə edənlər var idi və getdikcə çoxalırdı...
Bu gün məhz belə zamanda yaşayırıq. Uyğun gəldi, gəlmədi, sadəcə notları bir-birinin yanına düzməklə, işarəsiz-filansız real dünyaya göz açan “əsər”lərin siyahısı gündən-günə uzanır. Uzanan isə tək siyahı deyil, həm də əsl musiqini dərk edən insanların səbridir. Düzdür, Allah səbr edənləri sevər, amma hər dəfə hövsələmizi basıb etdiyimiz səbrlər kasanı doldurmaq üzrədir. Elə hər sahədə! Kasanı ağzınacan dolmağa qoymayaq ki, sabahın Üzeyir Hacıbəylisini də yetişdirə bilək. Bəlkə də söhbət sabahın Üzeyirlərindən gedir!
Dünən, bu gün, sabah... Yenə də dialektika. Anadan olandan ta dünyadan köçənə qədər dialektikanın qanunları bizi, biz də onu izləyirik. Əzrayıl isə nə təsadüfü izləyir, nə də zərurəti. Deməli, izlənməli olan bu gündür. Bu günün tamaşası, bu günün kinosu, gündəmin yazısı, aktual xəbər, günün lideri, prioritet musiqi və sair və ilaxir. Qalanlarını deyə bilməsək, əsl prioritet musiqi sabah da prioritet olacaq. Amma sabahın plagiat olacaq hər şeyi üçün bu gündən həyəcan təbili çalmaq lazımdır.
Yeddiliyin arasında altıncı not olan lya notunun məktəbə getmək üçün artıq hər şeyi hazır idi. Sadəcə gündəliyindəki qiymətləri Üzeyir bəy yazacaqdı. Təbii ki, söhbət layiqli qiymətdən gedir.
Odur ki, hamımızın Bilik və Musiqi günü mübarək! Xüsusən Birincilərin!
Tünzalə TAHİRQIZI
15.09.2014 çap et