525.Az
“Azərbaycan gəncliyi ictimai həyatın bütün sahələrində fəallığı ilə seçilir”
Milli Məclisin (MM) Beynəlxalq münasibətlər və parlamentlərarası əlaqələr komitəsinin sədr müavini Sevinc Fətəliyeva Rusiyanın Sankt-Peterburq şəhərində keçirilən MDB-nin Gənclər parlamentlərarası Forumunda iştirak edib. Forumda Rusiya Federasiyasının Təhsil və Elm Nazirliyinin gənclərlə iş agentliyinin müavini S. Çuev, Rusiya Federasiyasının Dövlət Dumasının deputatı, MDB-yə üzv dövlətlərlə iş komitəsinin üzvü, üçqat olimpiya çempionu İ. Rodina , MDB-yə üzv dövlətlərin gənc parlament üzvləri, gənclərin ictimai təşkilatlarının liderləri iştirak ediblər.
“Azərbaycanda dövlət gənclər siyasəti” mövzusunda çıxış edən S.Fətəliyeva deyib ki, müasir dünyada gənclərin rolu dünyanın inkişafına təsirdə kəskin şəkildə dəyişib. Onun dediyinə görə, gənclər bir çox sahələrdə dəyişiklik edən fəal qüvvə kimi özünü göstərirlər: “Həmişə olduğu kimi, bu gün də gənc nəslin qarşısında bu məsələlər durur: müəyyən peşə, həyat təminatı. Amma bununla yanaşı, bugünkü gənclik müasir dünyaya çağırışlar edir, öz həyatını formalaşdırarkən vətəndaş mövqeyini ortaya qoyur, siyasi proseslərdə fəallıq göstərirlər. Bu şəraitdə gənclərin dəstəklənməsi, onların təşəkkülü və formalaşması çox vacibdir.Bu gün Azərbaycanda həyata keçirilən gənclər siyasəti də müxtəlif sahələri əhatə edir: gənclərin təhsili, tərbiyəsi, sağlamlığı, intellektual və mənəvi inkişafı, asudə vaxtının təşkili, problemlərinin həlli, hüquqlarının qorunması, respublikanın ictimai-siyasi və mədəni həyatında onların iştirakı. Bu gün Azərbaycanda gənclər siyasəti ölkənin dövlət siyasətinin mühüm tərkib hissəsidir. Azərbaycan gəncliyi ictimai həyatın bütün sahələrində aktiv fəaliyyəti ilə seçilir, sosial, humanitar, iqtisadi və siyasi tədbirlərin həyata keçirilməsində mühüm rol oynayır. Dövlətin yaratdığı geniş imkanlar sayəsində, gənclər cəmiyyətin hərəkətverici qüvvəsinə çevrilib. Dövlət gənclər siyasəti – gənclərin öz bilik və bacarıqlarının, təbii potensialının effektli reallaşdırılmasını, cəmiyyətdə layiqli yer tutmasını təmin edən şəraitin yaradılması məqsədilə dövlət tərəfindən müəyyən edilmiş prioritetlər və həyata keçirilən tədbirlər sistemidir.
Gənclərin hərtərəfli inkişafı ölkənin sosial-iqtisadi, elmi və mədəni inkişafı ilə sıx əlaqədədir, onun qlobal rəqabətə davamlılığının, milli təhlükəsizliyinin vacib şərtlərindəndir. Yeni nəslin inkişafının əsas vasitəsi – gənclərin dövlətin və cəmiyyətin sosial-iqtisadi, ictimai-siyasi və mədəni həyatında iştirakının təmin edilməsidir. Dövlət gənclər siyasəti bu məqsəd və prinsiplərin reallaşdırılması üçün hazırlanıb, müvafiq hüquqi sənədlərdə öz əksini taparaq hökumət qurumları tərəfindən həyata keçirilir.Azərbaycanda ölkə əhalisinin əksəriyyəti gənclərdir. Məhz buna görə də gənclərin problemləri, dövlət prioritetlərindən biridir...”
Kamil Həmzəoğlu
25.10.2014 
çap et