Sabirabad rayon mərkəzindəki maye qaz yanacaq doldurma məntəqəsində qaz daşıyan iritonnajlı avtomobilin aşması nəticəsində ərazidə fövqəladə vəziyyət yaranıb. Lent.az-ın məlumatına görə, hadisə noyabrın 28-nə keçən gecə baş verib.
Məlumata görə, qazla dolu maşının aşmasına görə, ətrafda yaşayan insanlar təhlükəsiz yerə köçürülüb. Bundan başqa maşın Sabirabad şəhərini qazla təchiz edən qaz xəttinin bir neçə metrliyinə aşdığından şəhərə qaz verilməsi dayandırılıb.
Başqa bir məlumata görə, yanacaq doldurma məntəqəsinin ərazisi əvvəllər Sabirabad Sosial İqtisad Kollecinin balansında olub. Sonra isə orda məntəqə tikilib. Baş verən hadisədən sonra kollecdə dərslər də dayandırılıb.
Sabirabad rayon Polis Şöbəsindən verilən məlumata görə, propanla dolu yük avtomobili yanacaqdoldurma məntəqəsinin yaxınlığındakı su kanalına aşıb. Təhlükəsizlik məqsədi ilə ətrafdakı evlər və kollec binası boşaldılıb. Hazırda məntəqə rəhbərliyi Bakıdan gələcək böyük yükgötürmə qabiliyyətinə malik kranı gözləyir.
Ərazidə FHN-in yerli bölməsi keşik çəkir.
çap et