Xalqımızın milli-mənəvi dəyərlərinin kökləri hələ çox-çox qədim zamanlara gedib çıxır. Lakin XX əsrdə və xüsusən də XXI əsrdə mədəni həyatımızda yeni bir dövr başlanıb. Bu, ulu öndər, Ümummilli lider, böyük dövlət xadimi Heydər Əliyevin adı ilə bağlı olan bir dövrdür.
Elmimizin elə bir sahəsi olmaz ki, Heydər Əliyev qayğısından bəhrələnməmiş olsun. Heydər Əliyevin mədəniyyət sahəsinə olan diqqətini isə xüsusilə qeyd etmək lazımdır. Ulu öndər deyirdi: “Xalq bir çox xüsusiyyətləri ilə tanınır, sayılır və dünya xalqları içərisində fərqlənir. Bu xüsusiyyətlərdən ən yüksəyi, ən böyüyü mədəniyyətdir”. Azərbaycan xalqının inkişafı yolunda Heydər Əliyevin xidmətləri əvəzsizdir. Odur ki, ulu öndər hər zaman xalqımızın yaddaşında yaşayır, hər zaman xatirəsi anılır.
Bu il mayın 10-da Heydər Əliyevin anadan olmasının 92-ci ildönümü tamam olur. Bu münasibətlə Azərbaycan Milli Konservatoriyasında ulu öndərin doğum gününə həsr edilmiş, Tələbələrin I Elmi Konfransı keçirildi. İki ali təhsil müəssisəsinin - Azərbaycan Milli Konservatoriyası və Azərbaycan Dövlət Mədəniyyət və İncəsənət Universitetlərində təhsil alan tələbələrin qatıldıqları konfrans iki gün (16-17 aprel) davam etdi.
Konservatoriyanın rektoru, Xalq artisti, professor Siyavuş Kərimi çıxış edərək tədbirin böyük mahiyyət daşıdığını vurğuladı və çıxışçılara uğurlar diləyərək sözü konfrans iştirakçılarına ötürdü.
Öncə, Heydər Əliyevin çoxşaxəli fəaliyyətini əks etdirən videoçarx nümayiş olundu. Ulu öndərin fəaliyyət yolu bir daha, qısa şəkildə, salona toplaşanların gözü önündə canlandırıldı.
Bunun ardınca isə konfrans iştirakçıları öz çıxışlarını təqdim etdilər. Azərbaycan Milli Konservatoriyasının tələbələri Aydəmirova Firəngizin (VI kurs) - “Heydər Əliyev və Azərbaycan gəncliyi”, Primova Nərminin (II kurs)- “Milli mənəvi dəyərlərimizin tərkib hissəsi olan adət-ənənələrimizin qorunub saxlanılmasında və inkişafında Heydər Əliyevin rolu”, Cəfərova Nəsibənin (III kurs) “Heydər Əliyev və vətənpərvərlik” mövzusunda məruzələri dinlənildi.
Konfransda H.Əliyevin fəaliyyəti, onun mədəniyyət sahəsinə diqqət və qayğısı ilə bağlı məruzələrlə yanaşı, musiqi dünyasında müstəsna rolu olan bir sıra dəyərli bəstəkarlar, onların həyat və yaradıcılığı, habelə şifahi ənənəli professional musiqi janrı - muğam sənəti ilə bağlı çıxışlar da səsləndi.
Konservatoriyanın yetirmələri Babayeva Aydan (II kurs, magistr) “Azərbaycan xalq musiqisində gender problemi”, İsgəndərova Nərmin (II kurs, magistr) “Səid Rüstəmovun “Xalq çalğı alətləri orkestri üçün Konsert və 3 saylı süita”sı”, Hüseynzadə İlahə (II kurs, magistr) “Əfrasiyab Bədəlbəylinin musiqişünaslıq fəaliyyəti”, Nəsirova Mədinə (II kurs) “Milli mənəvi dəyərlərimizi qoruyaq və saxlayaq” mövzusunda çıxış etdilər.
Bu sıradan, Mahmudova Ülviyyə (II kurs, magistr) “Bəstəkar Vasif Allahverdiyevin “Heydər Əliyev - Ömür yolu” simfonik poeması”, Quliyeva Səadət (II kurs, magistr) “Cahangir Cahangirovun kantata-oratoriya yaradıcılığında xor yazı üslubuna dair”, Əhmədova Nərgiz (II kurs, magistr) “Azərbaycan musiqişünaslığı (1900-1950-ci illər)”, Hüseynova Məryəm (II kurs, magistr) - “Kamança alətinin tarixi və mənşəyi haqqında”, Abdulla Vəfa (II kurs, magistr) - “Azərbaycan muğamşünaslığı müasir mərhələdə”, Qasımova Gülnar (II kurs, magistr) “Azərbaycan muğamşünaslığı müasir mərhələdə” mövzusu barədə söz açdı.
Azərbaycan Dövlət Mədəniyyət və İncəsənət Universitetindən isə Mahmudova Aygünün (II kurs, magistr) “Şüştər” muğam dəstgahının səsyazıları və not yazılarına dair”, Abdurrahmanova Xəyalənin (II kurs, magistr) “Azərbaycan bəstəkarlarının fortepiano musiqisi (2000-2010-cu illər)” mövzulu məruzələri dinlənildi.
Konfransda Magistr tələbələrin çıxışlarının materialları nəfis şəkildə çap olunaraq təqdim edildi.
Şübhəsiz ki, tələbə elmi konfranslarının keçirilməsi gənc musiqiçilərə olan diqqət və qayğının təzahürüdür. Bu və digər tədbirlərin, konfransların təşkili gənclərin elmə olan marağının daha da artması, onların potensiallarının üzə çıxması, eyni zamanda daha səmərəli çalışması üçün stimulverici, məqsədyönlü addımdır.
Gələcəkdə bu cür konfransların beynəlxalq səviyyədə keçirilməsi barədə təkliflər də iştirakçılar tərəfindən böyük ruh yüksəkliyi ilə qarşılandı.
Fərdin MƏMMƏDLİ
musiqişünas, Üzeyir Hacıbəyli təqaüdçüsü
çap et