“Azərbaycanın daxili işlərinə qarışan xarici qüvvələrin qarşısı vaxtında alınır”

“Müxtəlif vaxtlarda Azərbaycanın daxili işlərinə qarışan, təzyiq göstərən xarici qüvvələr olur, amma biz onların qarşısını vaxtında ala bilirik”.

APA-nın məlumatına görə, bunu Qafqaz Müsəlmanları İdarəsinin (QMİ) sədri Allahşükür Paşazadə Fransanın Yəhudi İnstitutlarının Təmsilçilik Şurasının (CRİF) keçmiş rəhbəri Rişar Praskyenin rəhbərlik etdiyi nümayəndə heyəti ilə görüşündə bildirib.

Şeyxülislam qeyd edib ki, Azərbaycan din pərdəsi altında gizlənərək məzhəb ayrı-seçkiliyi salan qüvvələrə qarşı həmişə ehtiyatlıdır:

“İndi dünyada elə ölkələr var ki, onlar hələ də dini radikalizmə və məzhəb ayrı-seçkiliyinə qarşı mübarizə apara bilmirlər. Bir çoxları isə radikalizmə meyllidirlər və onları müəyyən ölkələr maliyyələşdirir. Amma bizdə bu, mümkün deyil”.