525.Az
BSU- da “Bir günlük Xəlifə”
BSU-nun rektoru, AMEA-nın müxbir üzvü prof. K.M.Abdullayevin təşəbbüsü və təşkilatçılığı ilə bu təhsil ocağında bir çox maraqlı layihələr həyata keçirilir. Bu layihələrdən biri də universitetdə təhsil alan, müxtəlif ixtisaslar üzrə peşəkar mütəxəssis olmağa hazırlaşan tələbələrin tələbə özünüidarəçiliyinə, yəni “Bir günlük Xəlifə” gününə cəlb olunmasıdır.
Bakı Slavyan Universiteti tələbələrinin müstəqil idarəçilik qabiliyyətinin inkişafına təkan vermək, intellektual səviyyələrini, işgüzar bacarıq və vərdişlərini yoxlamaq, onlar tərəfindən verilən uğurlu təklifləri təhlil edib həyata keçirmək məqsədilə həyata keçirilən bu maraqlı layihə ilk dəfə 2002-ci il dekabrın 13-də gerçəkləşib və həmin gün 14 rəhbər vəzifəyə tələbələrin namizədliyi irəli sürülüb. Obyektivliyi və şəffaflığı təmin etmək məqsədilə seçkilər tamamilə tələbələrin öhdəsinə buraxılıb və heç bir rəhbər şəxsin müdaxiləsi olmayıb. Növbəti “Xəlifə” günləri 2005-ci il 13 may, 2007-ci il 13 aprel, 2009-cu il 13 noyabr və 2011-ci il 13 dekabr tarixlərində həyata keçirilib və həmin günlər tələbələrin yaddaşında unudulmaz xatirəyə çevrilib.
Builki “Bir günlük Xəlifə” Tələbə Özünüidarəetmə günü 2012-ci il 13 dekabr tarixinə təsadüf etdi. Sentyabr ayından etibarən başlanılan hazırlıqlar artıq başa çatmışdı. Rektorun əmri ilə seçkilərin keçirilməsi vaxtı müəyyənləşdirilmiş və “Xəlifə” günü ilə bağlı bütün təşkilati işlər keçmiş “xəlifə”lərdən təşkil olunmuş münsiflər heyəti, Kölgə Kabineti və Tələbə Gənclər Təşkilatına tapşırılmışdı. Tələbələr onlara verilən xüsusi blanka özləri haqqında məlumatı və namizədlik verdikləri vəzifələr haqqında bildiklərini yazmışdılar. Sonra tələbələrin reytinq cədvəli, yəni onların tələbələr arasında nüfuz dərəcəsi müəyyənləşdirildi. Universitetin akt zalında 200-dən çox tələbənin iştirakı ilə seçkilər keçirilirdi və namizədlər müəyyən olundu. Qeyd etmək lazımdır ki, bu dəfəki “Xəlifə” günündə 22 vəzifəyə 170 tələbə namizədliyini irəli sürmüşdü. Sonra onlar öz aralarında debatlar keçirdi, platfomalarını təqdim etdilər. Ən maraqlı təklif və ən dolğun platforma ilə çıxış edən 22 tələbə rəhbər icraçı vəzifəsinə seçildi.
13 dekabrda xəlifələr iş gününə başlamazdan əvvəl ümummilli lider H.Əliyevin Fəxri Xiyabanda məzarını ziyarət etmiş və ölməz rəhbərimizin BSU-da yerləşən büstü önünə əklil dəstələri qoymuşdular. Builki “xəlifə”-rektor BSU-nun Magistratura şöbəsinin “Beynəlxalq jurnalistika” ixtisasında təhsil alan II kurs magistrant Almaz Axundova bildirdi ki: “Hər bir xəlifə tutduğu vəzifədən asılı olmayaraq öz işinə məsuliyyətli yanaşmalı, gələn qonaqları yüksək səviyyədə qarşılamalı və unutmamalıdır ki, hər birimiz Bakı Slavyan Universitetini layiqincə təmsil eməliyik”. Universitetin tədris işləri, elmi işlər, beynəlxalq əlaqələr, tərbiyə işləri və inzibati işlər üzrə “xəlifə”-prorektorları Vüsalə Cəfərova, Səmra Qasımzadə, Fəridə Qasımzadə,Aytac Məmmədova və Toğrul Göyüşlü bildirdilər ki, məhz bu layihənin Azəbaycanda ilk dəfə olaraq BSU-da həyata keçirilməsi, tələbələrə göstərilən etimad universitetimizi digər universitetlərdən fərqləndirir və tələbələrin özünüidarəçilik qabiliyyətlərinin formalaşmasında mühüm rol oynayır. “Xəlifələr” onu da qeyd etdilər ki, biz bu etimadı doğruldacağıq və öz vəzifələrimizin öhdəsindən layiqincə gələcəyik.
“Xəlifə günü” Serbiya Respublikasının Azərbaycandakı Fövqəladə və Səlahiyyətli səfiri Zoran Vayoviç BSU-nun qonağı oldu. Xəlifə rektor A.Axundova səfiri universitetdə görməkdən məmnun olduğunu bildirdi və BSU-nun yaranma tarixi, universitetin fakültələri, strukturu, onun zəngin elmi, tədris və tələbə həyatı, çoxşaxəli fəaliyyəti, eləcə də görüşün təsadüf etdiyi “xəlifə günü” haqqında ətraflı məlumat verdi. BSU-ya ilk dəfə qonaq gələn səfir Z. Vayoviç isə öz növbəsində bu cür tədbirlərin digər universitetlər üçün gözəl nümunə olacağını vurğuladı və qeyd etdi ki, gənclərlə işgüzar münasibətdə olmaq daha maraqlı və əlverişlidir, çünki gələcək gənclərindir. Səfir eyni zamanda, BSU-da Serb Dili və Mədəniyyəti Mərkəzini açmaq arzusunda olduğunu və universitetlə əlaqələrin daha da genişləndiriləcəyini qeyd etdi. Görüşün sonunda səfirə xatirə hədiyyələri təqdim edildi. Görüşdən sonra cənab Z. Vayoviç universitetlə tanışlıq çərçivəsində muzey, müxtəlif ölkələrin BSU-da fəaliyyət göstərən tədris-mədəniyyət mərkəzləri və müasir standartlarla yenidən qurulmuş kitabxanada qonaq oldu.
BSU-nun dostlarından biri olan Polşa Respublikasının Azərbaycandakı Fövqəladə və Səlahiyyətli səfiri Mixal Labenda da “xəlifə günü”ndə universitetin qonağı oldu. Xəlifə “rektor”la görüşdən sonra səfir M.Labenda Polşa tarixi haqqında məruzə ilə tələbələrin qarşısında çıxış etdi.
“Xəlifə” günü Ukrayna Respublikasının Azərbaycanakı Fövqəladə və Səlahiyyətli Səfiri Aleksandr Pavloviç Mişşenko universitetimizdə yüksək səviyyədə təşkil olunmuş Ukrayna Dili və Mədəniyyəti Mərkəzində tələbələrlə görüşdü. Görüşdə çıxış edən səfir bildirdi ki, “Ukrayna ilə Azərbaycan arasında bütün sahələr üzrə əlaqələr yüksək səviyyədə inkişaf edir”. A.P.Mişşenko onu da qeyd eti ki, Ukrayna-Azərbaycan əlaqələrinin qurulmasında BSU xüsusi çəkiyə malikdir. “BSU həmişə məni maraqlı və mənalı layihələri ilə təəccübləndirib. Tələbələrinizə yaratdığınız şərait, onlara demokratik dəyərlərə söykənərək göstərdiyiniz etimad diqqətəlayiqdir. İnanıram ki, bu gün inamlı addım atan, müstəqil qərar qəbul etmək bacarığına malik olan bu xəlifələr gələcək işlərində də çətinliklərin öhdəsindən asanlıqla gələcəklər”. Görüşün sonunda səfir tələbələrin suallarını cavablandırdı və xəlifələrlə xatirə şəkli çəkdirdi
“Xəlifə günü” çərçivəsində bir sıra maraqlı görüşlər də baş tutdu. Bunlardan “İrəli” İctimai Birliyinin təşkil etdiyi və Birliyin fəaliyyəti ilə bağlı təqdimat mərasimi xüsusilə yaddaqalan idi. Təqdimetmə mərasimində Birliyin insan resursları üzrə katibi Rövşən Camalov tələbələrə “İrəli” İctimai Birliyinin yaranma tarixi, mərkəzləri, şöbələri, Birliyin fəaliyyəti haqqında maraqlı məlumatlar vermiş, tələbələri öz sıralarına qatılmağa dəvət etmişdir.
ACCESS bank nümayəndələri də bu gün universitetdə oldular. Xeyriyyəçilik məqsədilə BSU-da olan bank nümayəndələri tələbələrlə görüşdə bankın yaranma tarixi, strukturu və layihələri barədə məlumat verdilər. Bankın filial müdiri Ş.Rüstəmov bank nümayəndəsi, universitetin məzunu H.Babayevin təşəbbüsü ilə BSU tələbələrinin sırasından 5 namizədin seçildiyini bildirdi və bu tələbələrə bank tərəfindən təqaüd kartlarını təqdim etdi. Xəlifə rəhbərlər həmçinin BSU-nun Tələbə Teatr Studiyasının quruluşunda yeni tamaşanın nümayişini keçirmiş, Xalq artisti R.Balayev, yazıçı N.Rəsulzadə və tanınmış jurnlist E.Şıxlı və “Qızıl Aypara” cəmiyyətinin nümayəndəsi M.Qaraxanova ilə görüşlər təşkil etmiş, gün ərzində BSU-nun əməkdaşlıq etdiyi xarici ölkə universitetlərinin tələbələrindən təbrik məktubları almışlar. Qeyd edək ki, universitetin foyesində pedaqoji fakültə tələbələrinin əl işlərindən ibarət sərgi hazırlanmış və tələbələrin yaradıcılığı nümayiş etdirilmişdir.
Universitetin II tədris binasında da isə NAYORA-ın meneceri P.Piriyevlə, “GREEN BAKU” nümayəndəsi A.Hüseynovla görüş keçirilmiş, Ekologiya mərkəzi və Gənc filoloqlar klubunun açılışı baş tutmuşdur.
Tələbələr “xəlifəlik” etdikləri bir gün ərzində BSU-da həmişəki iş rejimi gözlənilmiş və rəhbər vəzifələri icra edən 22 tələbə gün ərzində öz vəzifələrini məharətlə yerinə yetirməyə çalışmışlar. Keçirilən layihələrin ən maraqlı və vaciblərindən biri olan “Xəlifə günü” universitetdə gənclərə böyük etimad göstərilməsindən xəbər verir. Əbəs yerə deyilmir ki, DOCENDO DİSCİMUS – Öyrədərək öyrənirik.
Günay ƏLİYEVA
14.12.2012 çap et