525.Az
Türkiyədə və Şimali Kiprdə Mirzə Fətəli Günləri
Məlum olduğu kimi, TÜRKSOY 2012-ci ili Mirzə Fətəli Axundzadə İli elan edib. Bu təşkilatın təşəbbüsü və Azərbaycan Mədəniyyət və Turizm Nazirliyinin dəstəyilə dekabrın 14-dən 18-dək Şimali Kipr Türk Respublikasında və Türkiyənin Ankara və İstanbul şəhərlərində böyük yazıçıya həsr olunmuş geniş yubiley tədbirləri keçirilib.
Kiprdə Doğu Ağ Dəniz Universitetində keçirilən tədbirdə TÜRKSOY-un baş katibi Düsen Kaseinov, universitetin rektoru, Türkiyənin bu ölkədəki səfiri və Şimali Kiprin Mədəniyyət naziri, Universitetin müəllimləri və tələbələri iştirak ediblər. Yubiley tədbirinə Azərbaycandan Yazıçılar Birliyinin sədri, M.F.Axundzadəyə həsr olunmuş “Sübhün səfiri” filminin ssenari müəllifi Anar, filmin rejissoru Ramiz Həsənoğlu və M.F.Axundzadə adına Milli Kitabxananın müdir müavini Gülbəniz Səfərəliyeva dəvət ediliblər. Nümayiş etdirilən “Sübhün səfiri” filmi tamaşaçıların böyük marağına səbəb olub. Filmdən sonra keçirilən dəyirmi masada çıxış edən Düsen Kaseinov və başqa natiqlər filmi yüksək qiymətləndiriblər. Anar çıxışında Mirzə Fətəlinin Azərbaycan və ümumən türk dünyası, Şərq ədəbiyyatında böyük xidmətlərindən danışıb, filmə aid sualları cavablandırıb.
17 dekabrda Ankarada Milli Kitabxanada keçirilən tədbirə Bakıdan gəlmiş nümayəndə heyətinin üzvləri – Mədəniyyət və turizm nazirinin birinci müavini Vaqif Əliyev, M.F.Axundzadə adına Milli Kitabxananın müdiri Kərim Tahirov, tazirliyin şöbə müdiri Vaqif Bəhmənli də qatılıblar.
Tədbiri Milli Kitabxana başqanı Tüncəl Acar açıb. Azərbaycanın Türkiyədəki səfiri Faiq Bağırov, nazirin birinci müavini Vaqif Əliyev Prezident İlham Əliyevin sərəncamıyla M.F.Axundzadə yubileyinin Azərbaycanda da geniş qeyd edilməsindən söz açıblar. Düsen Kaseinov, Türkiyə Kültür və Turizm Bakanının müstəşarı Özgür Ozalsan Mirzə Fətəlinin böyük xidmətlərini nəzərə çatdırıblar. Avrasiya Yazarlar Birliyinin başqanı Yaqub Öməroğlunun sədrlik etdiyi dəyirmi masada Anar, Kərim Tahirov, qazaxıstanlı türkoloq professor Erden Kajıbey Mirzə Fətəli Axundzadənin həyat və yaradıcılığından bəhs ediblər. Ramiz Həsənoğlu film üzərində aparılan iş barədə danışıb. Tədbir iştirakçıları “Sübhün səfiri” filmini Azərbaycan kinosunun böyük nailiyyəti kimi dəyərləndiriblər. Qeyd edilib ki, Mirzə Fətəlinin ömrünü və əsərlərini paraq şəkildə əks etdirməklə yanaşı film Azərbaycan həyatının bütöv bir dövrünün mənzərəsini canlandırır.
Elə həmin gün TÜRKSOY-un binasında keçirilən tədbirdə Düsen Kaseinov, qurumun əməkdaşı Elçin Qafarlı, Vaqif Əliyev, Kərim Tahirov, Anar, Ramiz Həsənoğlu, Erden Kajıbey, çuvaş türkoloq Nikolay Yeqorov Mirzə Fətəli Axundzadənin türk xalqlarının ictimai fikrinin inkişafına göstərdiyi böyük təsiri minnətdarlıq hissiylə anıblar.
Dekabrın 18-də İstanbulun Aydın Universitetində keçirilən tədbirdə həm Universitetin dekanı professor Şuayib Karakaşın Mirzə Fətəliyə həsr olunmuş məruzəsi, rəsmi və elmi çıxışlar səslənib, həm də Anarın Universitetin müəllim və tələbələriylə ayrıca görüşü keçirilib. Görüşü universitetin müəllimi Kamil Vəli Nərimanoğlu aparıb, Gülbəniz Səfərəliyeva, universitetin müəllimi Rövşən Əlizadə çıxış ediblər. Anar müəllimlərin və tələbələrin çoxsaylı suallarına ətraflı cavablar verib.
Nümayiş etdirilən “Sübhün səfiri” filmi tamaşaçılar tərəfindən böyük maraqla qarşılanıb, tədbirin iştirakçısı məşhur şair Ataol Bəhramoğlu Azərbaycanın və Türkiyənin televiziya kanallarına verdiyi müsahibədə filmin qardaş ölkədə Mirzə Fətəlinin daha yaxından tanınması üçün müstəsna əhəmiyyət daşıdığını xüsusi qeyd edib.
21.12.2012 
çap et