525.Az

İki mədəniyyət layihəsinin yekunlarına həsr edilmiş təqdimat mərasimi keçirilib


 

İki mədəniyyət layihəsinin yekunlarına həsr edilmiş təqdimat mərasimi keçirilib <b style="color:red"></b>

“Sönməz Məşəl” Mədəni Əlaqələr İctimai Birliyi Azərbaycan Dillər Universitetinin İnformasiya-Resurs Kompleksində bu il reallaşdırdığı iki layihənin yekunlarına həsr edilmiş təqdimat mərasimi keçirib.

 

İctimai Birliyin sədri Şəhla Nağıyeva əvvəlcə  Açıq Cəmiyyət İnstitutu – Yardım Fondunun maliyyə dəstəyi ilə “Regionlardakı yaradıcı qadınlar: Qadınlar, ədəbiyyat və cəmiyyət layihəsinin genişləndirilməsi”  layihəsi barədə məlumat verib. Bildirib ki, bu ilin aprel ayından start verilən layihə çərçivəsində respublikanın müxtəlif regionlarında – Gəncə, Quba və Xaşmazda  yaşayan yazıçıların iştirakı ilə yaradıcı yazı üzrə seminarlar təşkil olunub,  seminarlara Amerikadan olan şair, ABŞ-ın Ayova ştatındakı Lüter kollecində Amerika ədəbiyyatı və yaradıcı yazı üzrə müəllim işləyən  Əlison Məndəvil rəhbərlik edib.

 

Seminarlarda yaradıcı yazı üzrə müzakirələr aparılıb, qadınların yaradıcılığa həvəsləndirilməsi istiqamətində söhbətlər təşkil olunub, əsərlərin müzakirələrinə xüsusi diqqət yetirilib.

 

Seminarın nəticəsi olaraq “Buta-II. Azərbaycanın regionlarında yaşayan qadın yazıçıların və Amerikalı şairin müasir nəsr və poeziya nümunələri toplusu” adlı kitab nəşr olunub. Kitabda təcrübəli qadın yazıçılarla yanaşı ilk qələm təcrübəsi olan yazıçıların şeir və hekayələri toplanıb, əsərlər ingilis dilinə tərcümə olunaraq Amerikalı şair Əlison Məndəvil tərəfindən redaktə edilib.

 

Çap olunan kitabların bir hissəsi ABŞ kitabxanalarına , bir hissəsi isə Azərbaycan kitabxanalarına, o cümlədən Azərbaycan Dillər Universitetinin kitabxanasına hədiyyə olunacaq.

 

“Sönməz Məşəl” Mədəni Əlaqələr İctimai Birliyi Açıq Cəmiyyət İnstitutu – Yardım Fondunun maliyyə dəstəyi ilə ötən il “Qadınlar, ədəbiyyat və cəmiyyət”  layihəsini həyata keçirib, Bakıda yaşayan gənc yaradıcı qadınlarla təşkil olunan seminarlardan sonra “Buta”  adlı ədəbiyyat toplusu nəşr etmişdi.

 

Təqdimat mərasimində yazıçı Naringül Babayeva , Svetlana Turan və Elvira Emil çıxış edərək layihənin əhəmiyyətini yüksək qiymətləndiriblər.

 

Seminarların rəhbəri olmuş Əlison Məndəvil tədbirə Amerikadan “Skype” vasitəsilə qoşularaq mərasim iştirakçılarına Azərbaycan dilində müraciət edib, Azərbaycanlı qadın yazarlarla əməkdaşlıqdan zövq aldığını bildirib.

 

Sonra İctimai Birliyin bu ilin noyabrında reallaşdırdığı ikinci layihə – “Rənglərin dialoqu: Azərbaycan-Almaniya“ layihəsinin yekunları barədə məlumat verilib.

 

Birliyin sədri Şəhla Nağıyeva Avropa Azərbaycanlıları Konqresi (AAK) ilə birlikdə reallaşdırılmış bu layihəni  Azərbaycan Respublikasının  Diasporla İş üzrə Dövlət Komitəsi tərəfindən maliyyələşdirildiyini xüsusi vurğulayıb.

 

O qeyd edib ki, layihənin məqsədi Azərbaycanın və Almaniyanın gənc qadın rəssamlarının əl işlərindən ibarət rəsm sərgisi təşkil etmək olub.

 

İki ölkənin qadın rəssamlarının əsərlərindən ibarət sərgi noyabrın 23-dən dekabrın 1-dək  Almaniyanın  Berlin şəhərindəki  nüfuzlu “Direktorenhaus” Qalereyasında  təşkil edilib. 

 

Sərgidə Azərbaycan tərəfdən gənc rəssamlar  Nərminə Vəliyeva və Şəhla Qəhrəmanlı, Almaniya tərəfdən Simona Vestfal və Nizaket Sinanovska iştirak edib.

 

Sərginin açılış mərasimində Azərbaycanın Almaniyadakı səfirliyinin əməkdaşları, Avropada fəaliyyət göstərən diaspor təşkilatlarının nümayəndələri, sadə alman tamaşaçılar iştirak edib, nümayiş olunan əsərlərə böyük maraqla baxıblar.

 

Sərgidə Azərbaycanın gənc rəssamlarının ümumbəşəri mövzularda işlədikləri rəsmlərlə yanaşı Dağlıq Qarabağın spesifik çalarlarını göstərən əsərləri də nümayiş edilib və bu, istər xaricdə yaşayan soydaşlarımızın, istərsə də Almaniyalı tamaşaçıların böyük marağına səbəb olub. Bütövlükdə bu tədbir Azərbaycan mədəniyyətinin Avropada təbliğinə, mədəniyyətlərarası dialoqun daha da zənginləşməsinə xidmət edib.

 

Berlinin aparıcı nəşriyyat evlərinin birində sərgiyə həsr olunmuş kataloq çap edilərək gələn qonaqlara hədiyyə  olunub. Kataloqda Qarabağa xüsusi məlumatlandırıcı səhifə həsr edilib, Azərbaycan və onun tarixi haqqında məlumat verilib.

 

Təqdimat mərasimində sərgi iştirakçısı olan rəssam Şəhla Qəhrəmanlı və gənc rəssam Nərminə Vəliyevanın anası, həvəskar rəssam Yeganə Vəliyeva çıxış edərək layihənin əhəmiyyəti və Berlin sərgisi barədə təəssüratlarını bölüşüblər.

 

Təqdimat mərasimində Berlin sərgisindən foto şəkillər nümayiş edilib.

 

 




21.12.2012    çap et  çap et