525.Az
Rus Avrasiyasımı, Türk Avrasiyasımı?
Telman NÜSRƏTOĞLU
Əsrlərdən bu yana Avrasiya məkanına hökm edən dövlətlərin dünyaya da hakim olduqlarını görməkdəyik.
Dünya enerji ehtiyatlarının 70% faizinə yaxınına da sahib olan bu bölgə stratejik ticarət koridorlarını, qlobal rola sahib dənizləri və ən əsası isə əsrlərə damğasını vurmuş millətləri özündə barındırmaqdadır. İki qütblü dünyanın çöküşü sonrasında daha da aktual olan yeni dünya düzəni arayışlarında yenə, Avrasiya uğrunda mübarizə və mümkün əməkdaşlıq modelləri bu nizamın müəyyənləşdirici faktoru olmuşdur.
Bu gün biz ölkəmizdə , bölgəmizdə və dünyada baş verən prosesləri də bu perspektiv dəyişim və çatışmalar fonunda analiz etməli və anlamalıyıq. Çünkü bu stratejik məkan uğrunda gedən mübarizədə ölkəmiz də ciddi bir faktordur. Azərbaycanın önəmi , bu geopoltikanın mərkəzində yer alması, çatışan tərəflərin hər biri üçün həm də lojistiq bir liman , soluqlama, duraqlama və güc toplama məkanı olaraq görülməsindədir.
Azərbaycan Türkiyənin Türküstana açılan qapısı, Rusiya üçün Qafqazda ən stratejik bir qala, Amerika və Avropa Birliyi üçün də istər malik olduğu sərvətlər, istərsə yerləşmiş olduğu məkan etibariylə yenə olduqca vacib bir dövlətdir. Azərbaycan həm də Türküstanla Anadolu və Avropanı birləşdirən İpək yolunun da keçid ölkəsidir. Rusiyanın dünya tarixində super güc olma yolundakı tarixi irəliləyişlərinə də göz atdıqda , Pyotrdan etibarən başlayan Xəzər yürüyüşlərinin və daha sonra da Qafqazın işğalının Rus stratejik yayılmaçılığı baxımından nə qədər önəmli olduğunu görə bilərik. Ruslar vaxtiylə Osmanlı imperatorluğunun idarəsi altındakı coğrafiyaları bir-bir ələ keçirərək Qaradənizə, Ağdənizə və Xəzərə lövbər saldılar və beləliklə də imperial vizyonlarını tamamladılar. Yəni XVI əsrdə Türk-müsəlman Astarxan və Kazan xanlıqlarınının Rusiya tərəfindən işğalı edilməsiylə, Osmanlıyla Rusiya arasındakı əsrlərə yayılan Avrasyaya hakim olma mübarizəsi XVIII əsrdə Kırımın ,XIX əsrdə də Qafqaz və Türküstanın Rusiya tərəfindən ələ keçirilməsiylə bu ölkənin xeyrinə tamamlanmış oldu. Əslində XIX əsr dünya Türklüyü və İslam aləminin tarixində ağır məğlubiyətlər,çöküş,köç və tarixi yurtların bir-bir itirilməsiylə yadda qaldı. Dünyanın üç qitəsinə hökm edən o şanlı imperatorluq –Osmanlı müxtəlif səbəblərdən dağlımağa başladıqca ümmət də, millət də qurdlar süfrəsində müxtəlif dövlətlərə yem oldu. Ancaq peyğəmbər məsajlarıyla ifadə etməyə çalışsaq hər bir çətinliyin arxasından asanlıq gələcək və Sovet dövlətinin dağılmasıyla bir çox əsir Türk xalqları da öz istiqlaliyətinə qovuşacaqdı.
Çox böyük enerji resurslarına sahib olan Türk Cümhuriyyətləri və yüksələn Türkiyə artıq yeni dünyanın bir gerçəyi olmuşdur. Həm Rusiya həm də diyər qlobal oyunçular xarici siyasətini bu stratejik məkanda baş verən yeni reallıqları nəzərə alaraq dizayn etmək məcburiyətindədir. Ancaq hələ də bu reallıqlarla barışmaq istəməyən Rusiyanın hərbi –kəşfiyyat elitası, başqa bir ifadəylə, dərin dövləti yeni Çar Putinin hakimiyyət yolunu açdı. Bu bir növü yeni bir proyektin siqnalıydı. Putinin gəlişiylə başlayan xarici siyasət açılımları həm də çətin keçəcək yeni mərhələnin xəbərçisiydi. Rusiya əslində soyuq savaşın bitmədiyini, Amerikanın Rusiya kuşatmasının daha fərqli bir vizyonda davam etdiyini görməkdəydi. 2000- ci ildə qəbul edilmiş olan Rusiyanın təhlükəsizlik və təhdid alqılamalarını ortaya qoyan sənəddə ən böyük təhlükə olaraq “ayrılıqçı hərərkətlərin” göstərilməsi 22 muxtar respublikanı tərkibində birləşdirən Rusiya Federasyasının qorxularını da üzə çıxardı. Bu sənəddə eyni zamanda Rusiya üçün ikinci bir təhlükə kimi iqtisadi asılılıq göstərilməkdəydi. Putinlə birlikdə Çeçenistanda başlayan hərbi əməliyatlar diğər cümhuriyyətlərə məsaj olduğu kimi, Bzejinskinin timsalında Rusiyanı üç hissəyə bölmənin xəyalını quran Amerikaya da mesajdı..
Ardınca iqtisadi sahədə də əməliyatlar başladı. Rusiyanın xarici iqtisadi-siyasi maraqlarını həyata keçirəcək beynəlxalq şirkətlərin Rusiya hərbi-kəşfiyat elitasına bağlanması və yeni iqtisadi mərkəzlərin qurulması prosesi sürətləndi. Bilindiyi kimi bu prosesdə Rusiya elitasının maraqlarına cavab verməyən bir çox iş adamı ölkədən qovuldu və ya həbs edildi. Rusiya müdafiədə oynamağın məğlubiyətə bərabər olacağını,yenidən imperial siyasi vizyona dönmənin vacibliyinə inanmışdı. Və bu strategiya doğrultusunda daxili hazırlıqlar tamamlandıqdan, Rusiya iqtisadi yüksəlişə keçdikdən sonra Yaxın Çevrə Doktirinası Putinin son prezident seçkilərindən sonra ciddi bir şəkildə gündəmə gəldi. Bu doktirinaya görə Rusyianın ilk hədəfi ön cəbhə ölkələri olaraq gördüyü MDB ölkələrini vahid bir çatı altında toplamaq və Avrasiya Birliyini qurmaqdır.
Dünya güclərinin Avrasya uğrundakı mübarizəsi həm də enerji mənbələrinə hakim olmaq uğrundakı mübarizədir. Amerika dünyanın jandarması rolunu oynarkən əsgəri operasyonlara ayırdığı böyük maliyələrlə özünün iqtisadi böhranın içində hissedərkən bu dövlətin dövlət istiqrazlarının əhəmmiyətli bir hissəsini alan Çin yüksəlmişdir. Ancaq Çinin də gündən -günə böyüyən dev iqtisadiyatının ortaya çıxardığı xammal çatışmamazlığı və enerji ehtiyacı, bunları təmin etmək potensialının mövcud olduğu Avrasyanın strateji önemini bir daha artırmaqdadır. Amerikalı stratejist Bzejinski məhz bu perspektivdən hərəkət edərək Çin və Rusiyanın nəzarət altına alına bilməsi üçün Avrasyanın enerji ehtiyatlarına hakim olmanın vacibliyini bəyan etməkdədir.
O bu məsələdə Amerikanın ən böyük müttəfiqi Türkiyə ola bilər deyir. Suriya və ardınca da İran ,əslində Rusiya ətrafındakı həlqənin daraldılması strategiyasının bir parçasıdır. Bu baxımdan Rusiyanın stratejik hakimiyət məkanının ən zəyif həlqəsi olaraq da Xəzər bölgəsi ortaya çıxmaqdadır. Hələ 2002 –ci ildən Rusiya Tükmənistan, Qazaxıstan və Özbəkistanla Avrasya Qaz İstehsalçıları Birliyini qurub Xəzər dənizinə yeni hərbi gəmilər göndərərək bölgədəki nüfuz savaşlarını öz xeyrinə həll etməyə çalışmaqdadır. Xəzər neft və qaz ehtiyatları Bəsrə körfəzinin də ən böyük alternatividir. Xəzər və Qaradəniz sahib olduğu enerji qaynaqlarıyla yanaşı Amerika və Rusiya üçün həm də Hindistan və Cənub Şərqi Asyaya keçiş dəhlizi olması səbəbiylə də önəmlidir. Avropanın qaz ehtiyacının 50% nin Rusiya tərəfindən qarşılandığını da nəzərə alsaq Avrasiya enerji koridorları və resurslarının əhəmmiyəti üzə çııxmaqdadır. Rusiya Avropanı qaz asılılğında saxlayaraq öz maraqlarını diktə etməyə çalışır. Avropa isə alternativ xətlər,mənbələr arayışındadır. Məhz bütün bu maraqlar çatışmasının kontekstində Ərəb baharı, Azərbaycan-Rusiya münasibətlərinin son durumu daha aydın anlaşılmaqdadır.
Rusiyanın Azərbaycandan istədiyini ala bilməməsi təziqlərin artmasına səbəb olmaqdadır.Gömrük Birliyi və ardınca gerçəkləşdirilmək istənən Avrasiya Birliyi Rusiyanın ətrafında daralan həlqəyi yarma cəhtidir. Rusiya Türküstan cümhuriyətləri və Azərbaycanı ram edərək Avrasiyaya yenidən hakim olmaq iddiasındadır.Gəl gör ki nə Türküstan o sərvətləri Rusiya tərəfindən sorulan köhnə Türküstandır nə də Azərbaycan. Türkiyə də “yurtda sülh cahanda sülh” doktirinasına bağlanan içinə qapanmış köhnə Türkiyə deyil. Ərdoğanla birlikdə Türkiyə dünyanın daha dərin stratejiq nöqtələrə nüfuz etməyə başladı. İndi daim inkişaf edən iqtisadiyatı ,hərbi-sənaye kompleksindəki yüksələn yatırımları, Rusiya və Ukraynada belə maraqla izlənən televizya filmləriylə Türkiyə 2023 –ün böyük Türkiyəsinə doğru irəliləməkdədir. İndi həm Avropa – Amerika ittifaqı həm də Çinlə Rusiya Türkiyəylə əməkdaşlığın önəmini daha yaxşı anlamaqdadır.
Bütün çatışmamazlıqlara,demokratik inistutların zəyifliyinə,ədalətli gəlir dağılımının olmamasına baxmayaraq Türk cümhuriyətləri yerində saymır, ordusuyla , iqtisadiyatıyla inkişaf edir.Ən əsası müstəqilliyin əsasları möhkəmlənir. Türkiyəylə,İslam dünyasıyla inteqrasiya artır. Bu gün Rusiyada sayına görə Slav mənşəli xalqlardan sonra ikinci sırada Türk dilli xalqlar, müsəlmanlar gəlməkdədir. İstər Çinin, istərsə də Rusiyanın cilovlanması prosesində Amerika və Avropa Türk dünyasına möhtacdır. Ərəb baharından sonra Türkiyənin İslam dünyasındakı liderlik missiyası bir daha ortaya çıxdı. Çinin xaricdə Amerikanı daxildə isə Uyqurları ən böyük təhlükə olaraq görməsi də bilinən bir həqiqətdir .
Bu ölkənin də Türk-müsəlman əhalsi üzərində ən böyük təsir imkanlarına malik olan ölkə yenə Türkiyədir. Tatarıstanın latın əlifbasına keçişinə belə mane olan Rusiya da bu hərəkətiylə yenə də zəyif nöqtələrini ortaya qoymaqdadır. Türkiyənin Türk cümhuriyyətləriylə inteqrasiyasının dərinləşməsi , Bakı-Ceyhan,TANAP kimi neft-qaz layihələrinə Qazaxıstan və Türkmənistanın da qoşulması Türkiyənin enerji tranzit dəhlizi olmasına gətirib çıxara bilər. Qazağıstan və Qırğızıstan prezidentlərinin son Ankara səfərlərində Türk Birliyinin vacibliyini vurqulamaları ,Azərbaycanın qardaş ölkəyə real dəstəyi Rusiyada narahatlıqla izlənməkdədir. Ancaq Türk Avrasiyasının önündə müəyyən ciddi maneələr də var. Türk cümhuriyyətləri istər Xəzərin statusu, istərsə də neft-qaz layihələrini həlli məsələsinə müştərək maraqlar çərçivəsindən baxmalı və bu məsələləri Amerikanın da dəstəyini alaraq həll etməlidir. Bunun alternativi isə yenidən Rusiyanın diktə etdiyi bir birlikdə yer almaq və rus Avrasiyasının qurulmasına xidmət etməkdir.
26.12.2012 çap et