525.Az

Gənclər Təşkilatlarının II Milli Konqresi başa çatdı


 

Gənclər Təşkilatlarının II Milli Konqresi başa çatdı<b style="color:red"></b> Azərbaycan Respublikası Gənclər Təşkilatları Milli Şurasının 20-ci il dönümünə həsr olunan Gənclər Təşkilatlarının II Milli Konqresi başa çatıb.
 
Şuradan 525.az-a verilən məlumata görə, Gənclər və İmdan Nazirliyi, Azərbaycan Respublikası Prezidenti yanında Gənclər Fondunun dəstəyi ilə həyata keçirilən konqresdə dövlət rəsmiləri, ARGTMŞ-ın üzvü olan və qeyri üzv gənclər təşkilatlarının rəhbərləri, mətbuat nümayəndələri iştirak ediblər.

Gənclər Təşkilatlarının II Milli Konqresinin əsas məqsədi ölkədəki bütün gənclər təşkilatlarını bir araya gətirərək onları birləşdirmək və həyata keçirilən gənclər siyasəti, habelə gənclər təşkilatlarının potensialının gücləndirilməsi və idarəetmənin effektiv mexanizmlərin yaradılması haqqında müzakirələr aparmaq, prioritet istiqamətlər və vəzifələr barədə qərarlar qəbul etmək, ümumilikdə isə gəncliyin inkişafına töhfə verməkdən ibarət olub.

Konqres zamanı 2 paneldən ibarət olan “Azərbaycanın Gənclər Siyasəti: Müasir Çağırışlar və Davamlı İnkişaf” mövzusunda Davos formatında müzakirələr həyata keçirilib. Prezident Administrasiyasının ictimai-siyasi məsələlər şöbəsinin gənclər təşkilatları ilə iş sektoru, müdiri Vüsal Quliyev, Gənclər və İdman Nazirliyinin Gənclərlə iş şöbəsinin müdiri İndira Hacıyeva, Azərbaycan Respublikası Prezidenti yanında Gənclər Fondunun aparat rəhbəri Faiq Qürbətov, Gənclər və İdman Nazirliyin Gənclərlə iş üzrə İctimai Şuranın rəhbəri Nürəddin Mehdiyev, BMT-nin Əhali Fondunun proqram meneceri Məzahir Əfəndiyevin spikerliyi ilə baş tutan Davos formatında müzakirələrdə gənclərlə bağlı əsas mövzular müzakirə olunub.

Gənclər təşkilatlarının nümayəndələri tərəfindən səsləndirilən suallar spikerlər tərəfindən cavablandırılıb, həmçinin gənclər tərəfindən mövzu ətrafında təkliflər verilib. Tədbirin sonunda gənclər təşkilatlarının nümayəndələri təltif olunublar.

Xatırladaq ki, Gənclər Təşkilatlarının Milli Konqresinin təşkil olunması ilə bağlı təşəbbüs ilk dəfə 2012-ci ilin noyabr ayında həyata keçirilən Gənclər Təşkilatlarının IV Respublika Sərgisi zamanı Azərbaycan Respublikasının Prezidenti İlham Əliyev sərgini ziyarət edərkən səsləndirilib. Daha sonra 2013-cü ilin sentyabr ayında Azərbaycan Respublikası Gənclər Təşkilatları Milli Şurasının təşkilatçılığı, Gənclər və İdman Nazirliyinin dəstəyi ilə Gənclər Təşkilatlarının I Milli Konqresi təşkil olunub. Konqresdə 200-dən çox gənclər təşkilatının nümayəndələri, dövlət rəsmiləri, beynəlxalq qurumlar və mətbuat orqanlarının nümayəndələri iştirak edib.

Vəfa MƏMMƏDLİ
 




27.11.2015    çap et  çap et