525.Az
Bahar Muradova: “Almaniyanın çoxillik təcrübəsi bizim üçün çox əhəmiyyətlidir”
Milli Məclis (MM) sədrinin müavini Bahar Muradova ölkəmizdə səfərdə olan Almaniya Bundestaqının deputatı Viola von Kramon-Taubadelin başçılıq etdiyi nümayəndə heyəti ilə görüşüb.
Bahar Muradova Azərbaycanla Almaniya arasında əlaqələrin qədim tarixi köklərinin olduğunu, bu gün isə əlaqələrin yüksələn xətlə inkişaf etdiyini qeyd edib və bildirib ki, tarixin müxtəlif vaxtlarında xalqlarımızı birləşdirən ümumi dəyərlər çox olub və bu dəyərlərin qorunması, möhkəmlənməsi sevindirici haldır. Bahar Muradova daha sonra Almaniyanın inkişaf etmiş, Azərbaycanın isə inkişaf etməkdə olan ölkə olduğunu diqqətə çatdırıb:
“Respublikamızın dinamik inkişafı, qısa müddətdə əldə olunan uğurlar tezliklə bizim də inkişaf etmiş dövlətlər sırasına qoşulacağımızı söyləməyə əsas verir. Bu gün Azərbaycanın qarşısında duran ən böyük hədəf də məhz budur. Bu inkişaf prosesində bizim əsaslandığımız dəyərlər demokratiya, insan haqları, tolerantlıq, söz və vicdan azadlığı ənənələrinin möhkəmlənməsidir”.
Vitse-spiker eyni zamanda bildirib ki, ölkəmiz daha çox öz sərvətlərini insan potensialını reallaşdırmaq üçün sərf edir: “Bu istiqamətdə dost ölkələrin, o cümlədən Almaniyanın çoxillik təcrübəsi bizim üçün çox əhəmiyyətlidir”.
Bahar Muradova parlament nümayəndə heyətlərimizin beynəlxalq təşkilatlarda, həmçinin ATƏT PA-da uğurlu əməkdaşlığından söz açdı, bir çox məqamlarda mövqelərimizin üst-üstə düşdüyünü vurğulayıb. O, Almaniyanın İPS – Beynəlxal Parlament Təqaüdü Proqramı çərçivəsində azərbaycanlı gənclərə xüsusi yer ayırdığına görə minnətdarlığını bildirib, bu proqramın əlaqələrimizin güclənməsində önəmli rolu olduğundan danışıb. Vitse-spiker qonağa Dağlıq Qarabağ münaqişəsi ilə bağlı mövcud vəziyyət barədə ətraflı məlumat verərək bildirib ki, Ermənistanın 20 faiz torpaqlarımızı işğal altında saxlaması, 1 milyon soydaşımızın yurd-yuvasından digərgin düşməsi, qaçqın həyatı yaşaması bölgənin inkişafına və təhlükəsizliyinə böyük maneə törədir.
Səmimi görüş və ətraflı məlumat üçün təşəkkürünü bildirən Viola von Kramon-Taubadel Azərbaycanla Almaniya arasındakı münasibətlərin hazırkı səviyyəsini yüksək qiymətləndirib və qeyd edib ki, bu əlaqələrin daha geniş inkişafı üçün hər cür imkan var. Azərbaycanın öz təbii sərvətlərini insan kapitalına yönəltməsini alqışlayan xanım Kramon-Taubadel bu istiqamətdə qarşıya qoyulacaq məqsədlərin uğurla reallaşacağına əminliyini ifadə edib. Almaniyalı deputat İPS – Beynəlxal Parlament Təqaüdü Proqramı çərçivəsində təhsil alan həmyerlilərimizə hər cür dəstək verməyə hazır olduqlarını vurğulayıb.
Azərbaycanın sürətli inkişafından söz açan qonaq bu günlərdə Bakıda start götürəcək yeniyetmə qızlar arasında futbol üzrə dünya çempionatının bu inkişafın göstəricisi olduğunu da bildirib. Söhbətdə həmçinin, Dağlıq Qarabağ münaqişəsindən danışan qonaq problemin ədalətli həllinə tərəfdar olduğunu ifadə edib.
Kamil HƏMZƏOĞLU
20.09.2012 çap et