Gedəndə göz yaşımı görmədin çıxıb getdin,
Dəyər gözüm yaşına vermədin çıxıb getdin.
Bir incəliklə demək istədim sənə sözümü,
Salıb kobudluğa dindirmədin çıxıb getdin.
Daha bu qəlbə ele girmisənki çıxmazsan,
Fəqət həyatıma sən girmədin çıxıb getdin.
Bütün ümüdlərimi məhv edib gedəndinsə,
Nədəndi bəs məni öldürmədin çıxıb getdin.
Nə sirr idi gəlişində bilinmədi məqsəd,
Gedəndə də elə bildirmədin çıxıb getdin.
Vəli, şikayətin heç vaxtı bitmədi axır
Öz istəyin tək ömür sürmədin çıxıb getdin.
lll
Nə gözün təki göz olmaz, nə üzün təki gözəl üz,
Nə üzün təki üz olmaz, nə gözün təki gözəl göz.
Məni ləblərindəki söz necə valeh etməsin ki,
Nə ləbin təki ləb olmaz, nə sözün təki gözəl söz.
Dayanıb yolunda hər gün səni izlərəm, mənimçün
Nə yolun təki yol olmaz, nə izin təki gözəl iz.
Dedilər ki, gəlməyirsən, hədər imiş intizarım?
Nə canımda tab vardır, nə də bir xəbər verən düz.
Hələ gəlməyibsə yarım, mənə, saqi, mey yaraşmaz,
Vəliyə nə badə təklif eləyib şərabdən süz.
lll
Deməyə dərdimi kaş ki bir adam tapsaydım,
Mən də dincəlməyə asudə məqam tapsaydım.
Cövrünü çox eləsəydi nola yarım, mən də
Cövrü-cananıma canımda davam tapsaydım.
Naşadam, şad olaram, canımı qurban demişəm,
Onu vəsf etməyə layiqli kəlam tapsaydım.
Mənə yarımdan onun hicri halal qismətdir
Vəslini hətta götürməzdim haram tapsaydım.
Unudardım yarısın bəlkə də bəxtsizliyimin,
O xəyalımdakı xoşbəxtliyi tam tapsaydım.
Vəli illərdi buraxmış məni o kor bəxtim
Bir baxışla eliyərdim onu ram tapsaydım.
Həyat və ölüm
Kitablar bu cür yazır
Həyat müvəqqətidir,
Ölümsə mütləq...
Bütün həyata ağla
Fikirləş ölüm haqda,
Gülümsə mütləq !!!
Kitablar çox sevirlər təzadlı cümlələri
Olmaq və ya olmamaq,
Yəni ki, həyat, ölüm...
Hər nidada bir təzad
Cəmi bir saat həyat !!!
Elə o saat ölüm !!!
Amma yazmır kitablar
Ölümlər niyə belə
Kiçilir, ucuzlaşır ...
Yenə də bu bəlkələr bürüyür fikrimizi
Ya ölüm adiləşir
Ya həyat quduzlaşır !!!
Həyat çox bahalaşıb
Bu çətin bahalıqda
Adam qalmaq istəmir ...
Nə də bu bahalıqda
Belə ucuz ölümlə
Adam ölmək istəmir !!!
çap et