Nigar Ələsgərova “Odlar Yurdu” Gənclər İctimai Birliyinin həmtəsisçi və sədridir. Artıq dörd ildir rəhbərlik etdiyi təşkilat digər qeyri-hökumət təşkilatları arasında xüsusi fəallığı ilə seçilir.
Təşkilat İtaliya, Norveç, Ruminiya, Yunanıstan, Bolqarıstan, Belçika və bir sıra başqa Avropa ölkələrinin keçirdiyi layihələrin tərəfdaşı olub.
Bu yaxınlarda Bakıda təşkilatın dörd illik hesabat tədbiri keçirilib. Nigar xanımla həm hesabat tədbirindən, həm də Birliyin fəaliyyətdən danışdıq.
- 2012-ci ildə Gəncə şəhəri respublikamızın ilk “Gənclər paytaxtı” seçildi. Bizim təşkilatın taleyi də elə bununla bağlıdır. Dörd il öncə Gəncədə gənclər təşkilatları sayca o qədər də çox deyildi və bu cür təşkilatların yaranmasına ciddi ehtiyac vardı. O zaman biz “Odlar Yurdu” Gənclər İctimai Birliyini təsis etdik. Məqsədimiz gənclərə xidmət etmək, gənclərin ölkənin, şəhərin ictimai-siyasi həyatında fəallığına nail olmaq, onları ictimai fəaliyyətə və aktivliyə cəlb etmək idi... Ölkədə iki yüzdən çox gənclər təşkilatı fəaliyyət göstərir. Son dövrlər gənclər və gənclər təşkilatlarına göstərilən diqqət və qayğı bu sahədə dövlətin ciddi islahatlarının, məqsədyönlü siyasətinin nəticəsidir. Xüsusilə, gənclər təşkilatlarının fəaliyyətləri son dərəcə genişləndirilib. Bu mənada biz həmin diqqət və qayğını dəyərləndirməyə çalışırıq. Gənclər isə bizi, fikrimcə, keyfiyyətli layihələrimizə görə seçirlər.
Təşkilatın prioritet istiqamətləri
- Təşkilat məqsədinə çatmaq üçün 5 prioritet istiqamət müəyyən edib: vətənpərvərlik, könüllülük, aktiv vətəndaşlıq, intellektual inkişaf və ətraf mühitin mühafizəsi. Dörd il ərzində bu istiqamətlər çərçivəsində müxtəlif layihə və tədbirlər həyata keçirmişik. Müxtəlif təcrübələri öyrənmiş və tətbiq etməyə çalışmışıq. Amma milli koloriti qorumağa üstünlük veririk. Mütləq şəkildə hədəf qrupumuzun, gənclərin düşüncə tərzini, yanaşmalarını, istəklərini kifayət qədər nəzərə alırıq. Avropa ölkələrində icra olunan bir çox layihələrin tərəfdaşı olmuşuq. Müxtəlif beynəlxalq layihələrdə gənclərin iştirakını təmin edirik. Bu da onların dünyagörüşünün artmasına, başqa ölkələri, başqa mədəniyyətləri, cəmiyyətləri tanımalarına yardımçı olur.
Ümumiyyətlə, çaılışırıq ki, gənclərin maraqlarına uyğun layihələr reallaşdıraq. Eyni zamanda onlar arasında milli ruh və vətənpərvərlik duyğularını, ideyalarını yaymağa çalışırıq. Aktual mövzulara müraciət edirik.
Misalçün, bu yaxınlarda “Gələcək vəd edən həqiqətlər: multikulturalizm və gənclik” layihəsini icra etdik.
Cari ilin ölkə başçısı İlham Əliyev tərəfindən “Multikulturalizm ili” elan olunmasını nəzərə alaraq layihəni hazırlamışdıq. Layihə Azərbaycan Respublikasının Prezidenti yanında Gənclər Fondunun dəstəyi ilə həyata keçirildi. Layihənin əsas vəzifəsi multikulturalizmin Azərbaycan modelinin gənclər tərəfindən öyrənilməsi ilə yanaşı, gəncləri bu mövzuda maarifləndirmək və dünyagörüşlərinin artmasına xidmət etməklə onlarda vətənpərvərlik, tolerantlıq, humanizm, insansevərlik kimi dəyərlər aşılamaq idi. Layihə uğurla yekunlaşdı.
Gənclərin təəssüratları yüksək idi. Bundan başqa, turizmə, ətraf mühitin mühafizəsinə həsr olunmuş müxtəlif layihələr də olub... Hər biri özlüyündə zamanın aktual mövzusu olub ki, bu mövzu ətrafında gənclərin maariflənməsinə xüsusi diqqət etmişik. Bununla yanaşı, davamlı keçirdiyimiz bilik yarışları, təlimlər, seminarlar, dəyirmi masa və görüşlər var. Bunlar bizim “İntellektual inkişaf” adlı prioritet istiqamətimizin tərkib hissəsidir... Düşünürük ki, cəmiyyətdə müxtəlif mövzularda maariflənmə davamlı olmalıdır. İstənilən ideoloji, ictimai və s. problemlərin həlli maarifləndirmədən keçir. İdeoloji tərbiyə çox önəmlidir. Bacardığımız qədər, “Odlar Yurdu” Gənclər İctimai Birliyi olaraq gənclərə xidmət edirik. Dolayısı ilə cəmiyyətə, gələcəyə xidmət etmiş oluruq. Ətrafımıza daha çox gənc toplamağa, daha çox gəncin maariflənməsində rol oynamağa çalışırıq. Çalışırıq ki, daha geniş beynəlxalq əlaqələr quraq, ölkənin dəyərlərini və mövqeyini təbliğ edək, bu prosesə daha çox gənci cəlb edək.
“Odlar Yurdu”nun uğurları...
- Bir qurumun yaranıb formalaşması üçün ən azı beş il lazımdır. Ancaq təvazökarlıqdan kənar da olsa, bildirim ki, təşkilatımız “Odlar yurdu” komandasının əzmi və eyni zamanda ona göstərilən etimad və dəstəkdən dolayı xeyli uğurlu yol qət edib. Statistikaya nəzər salsaq, bu dörd ildə 17 irimiqyaslı yerli layihə icra etmişik. Bu, təxminən, il ərzində 4-5 layihə deməkdir. Qeyri-hökumət təşkilatları üçün bu, kifayət qədər ciddi rəqəmdir. Bundan başqa, yüzə yaxın təlim, seminar, aksiya, görüş və konfranslar həyata keçirmişik. 16 beynəlxalq layihənin adını çəkə bilərəm ki, onlardan ikisi Gəncədə, digərləri isə müxtəlif ölkələrdə həyata keçirilən, tərəfdaşlıq etdiyimiz layihələrdir. Gənclər təşkilatı olaraq bir sıra mükafatlar qazanmışıq. “İlin QHT-si” və “The First” Milli Mükafatına layiq görülən ilk gənclər təşkilatıyıq. 2 fevral 2015-ci ildə - “Gənclər günü”ndə Azərbaycan Respublikası Gənclər və İdman Nazirliyi tərəfindən 2014-cü ildəki uğurlu fəaliyyətimizə görə təltif olunmuşuq. Bizim birlik Azərbaycanda “Avropa Könüllülük Xidməti”ndən akkreditasiya sertifikatı almış ən gənc gənclər təşkilatıdır... Uğurları sadalayarkən bir fikri də vurğulamaq istərdim. Uğur elə bir anlayışdır ki, kimin onu nədə və ya harda görməsi önəmlidir. Misal üçün, Gəncə şəhərinin ictimai həyatına baxsaq, müxtəlif sahələrdə çalışan fəal gənclərin böyük əksəriyyəti ilk addımlarını məhz “Odlar Yurdu”nda atıblar. “Odlar Yurdu” bir məktəb olmağı bacarıb, gələcək yollarını müəyyənləşdirməkdə gənclərə yardımçı olub. Düşünürəm ki, bu faktlar da çox ciddi uğur hesab oluna bilər.
Region gəncləri ilə əməkdaşlıq...
- Fəaliyyətimizin əsas hissəsi Gəncə şəhərindədir. Qeyd etdiyim kimi, Gəncə şəhərində fəaliyyətə başlamışıq və bu günə qədər də fəaliyyətimiz uğurla davam edir. Bir çox layihələrimizdə iştirakçı seçimi zamanı mümkün qədər təkcə Gəncədən deyil, eyni zamanda müxtəlif regionlardan və paytaxtdan da gəncləri cəlb etmişik. Bundan sonra da bu siyasətimizə sadiq qalaraq hansı şəhərdə fəaliyyət göstərəcəyimizdən asılı olmayaraq respublika gənclərini əhatə etməyə çalışacağıq.
Dörd ilin hesabatı
- Bu il iyulun 15-də Bakı şəhərində dörd illik hesabat tədbirimiz oldu. Bu tədbir həm də kiçik təqdimat xarakteri daşıyırdı. Biz artıq tək Gəncədə deyil, Bakı şəhərində də fəaliyyətimizi genişləndirəcəyik. Hesabat tədbirinə böyük həyəcanla hazırlaşdıq. Bu bizim Bakı şəhərində ilk böyük tədbirimiz idi. Uğurlu alındı deyə bilərik. Dövlət qurumlarını təmsil edən rəsmi şəxslərin, dostlarımızın, əməkdaşlarımızın haqqımızda səsləndirdiyi yüksək fikirlərdən qürurlandıq, eyni zamanda, daha çox məsuliyyət hiss etdik. Fəaliyyətimizə dəstək olan hər kəsə təşəkkür edirik.
Layihələr davam edir
- Bəzən çətinliklərlə də üzləşirik. Amma önəmli olan budur ki, qarşılaşdığımız çətinlikləri aradan qaldırmaq üçün işimizə zəhmət və səylə yanaşırıq. Fəaliyyətimiz zamanı gənclər təşkilatları ilə çalışan qurumlar və şəxslərin dəstəyi də danılmazdır. Ümid edirəm ki, bundan sonra da qarşılaşacağımız problem və çətinliklərin öhdəsindən hər zamanki komanda birliyi sayəsində zəhmət və qətiyyətlə gələcəyik... Hazırda “Ganja in action” və “Media Məktəbi-2” adlı layihələrimiz davam edir. Yeni və maraqlı layihələrimiz də mütləq olacaq. “Odlar Yurdu” ona göstərilən etimad, güvən və inama hər zaman sadiqliyini nümayiş etdirəcək və fəaliyyəti ilə faydalı olmağa çalışacaq...
Müşfiq ŞÜKÜRLÜ
çap et