Dünya şöhrətli sənətkarımız, Xalq artisti Zeynəb xanım Xanlarovaya ithaf
Zeynəb - səhnəmizin gözəl Leylisi,
Bahar təranəli bülbülümüzdür;
"Şüştər"in, "Segah"ın səsidir səsi,
Odu, atəşi - eşq, çələngi sözdür.
Ucalıq gətirib sənəti bizə,
Misilsiz sərvəti - ecazkar səda;
Bakıda doğulan müğənnimizə
Gül-çiçək verilib Amerikada!
Zeynəb ulduzudur nəğməli bürcün,
Dost, qardaş ellərdə ötməyi tarix;
Əsgər oğullarla görüşmək üçün
Ön cəbhə xəttinə getməyi tarix.
Müşfiq dühasından ilham alaraq,
Yolu Sayadlara salmağı xoşdur;
Kasıbın evində yandırıb çıraq,
Millət vəkili də olmağı xoşdur.
Onu dəfələrlə alqışlayıbdır,
İstanbul, Buxarest, Tokio, London...
Ona xoş duyğular bağışlayıbdır
Şərqdə - Çin, Hindistan, Qərbdə - Paris, Bonn.
Gəlir teleqramı, gəlir təbriki,
Onu sevənlərin, tanıyanların;
Vətənlə bərabər cahan deyir ki,
Ad günü mübarək Zeynəb xanımın!