Cənubi Koreyanın Azərbaycandakı səfiri Kim Çanq-gyu Azərbaycan Respublikasının Prezidenti yanında Bilik Fondunun qonağı olub.
Fonddan 525.az-a verilən məlumata görə, icraçı direktor Oktay Səmədov və Fondun əməkdaşları ilə keçirilən görüşdə xalqların bir-biri ilə daha sıx əlaqələr yaratması istiqamətində həyata keçirilə biləcək layihələr ətrafında geniş fikir mübadiləsi aparılıb.
Bilik Fondunun fəaliyyəti barədə ətraflı məlumat verən icraçı direktor Fondun xüsusən beynəlxalq səviyyədə gördüyü işlərə diqqət çəkib.
O.Səmədov cənab səfir Kim Çanq-gyunu Bilik Fondunun "Səfir saatı" klubuna üzv olmağa dəvət edib. Klub Azərbaycanda fəaliyyət göstərən səfirliklərin, diplomatik nümayəndəliklərin rəhbər şəxslərini yerli və xarici gənclərlə görüşdürəcək, ölkəmizi daha yaxından tanımaları üçün diplomatların bölgələrə səfərlərini gerçəkləşdirəcək.
O.Səmədov Azərbaycanla Cənubi Koreya arasında elmi, mədəni münasibətlərin genişlənməsinə xidmət edən maarifləndirici tədbirlərin mütəmadiliyini təmin etmək məqsədi ilə Niyyət Protokolunun imzalanmasına ehtiyac olduğunu bildirib.
Görüşdə Bilik Fondunun Aparat rəhbəri İsaxan Vəliyev işgüzar səfər çərçivəsində bir neçə dəfə Cənubi Koreyanın paytaxtı Seul şəhərində olduğunu xatırladaraq, bu ölkənin insanları ilə qurulan təmaslardan məmnunluq duyduğunu dilə gətirib. Cənubi Koreyanın Azərbaycandakı fövqəladə və səlahiyyətli səfiri Kim Çanq-gyu Bilik Fondunda olmaqdan zövq aldığını bildirərək, əməkdaşlığın perspektivlərindən söz açıb. Azərbaycanlılarla Cənubi Koreyalıların eyni dil qrupuna aid olduqlarını deyən cənab səfir bu səbəbdən hər iki xalqın oxşar cəhətlərindən danışıb. Kim Çanq-gyu deyib ki, Azərbaycanda milli mənəvi dəyərlərin qorunması, inkişaf etdirilməsi xalqın mədəni təfəkkürünün formalaşmasına böyük təkandır və idarəetməyə tətbiq olunan bu yanaşmanın xaricdə nümunə kimi təqdimatı vacibdir.
Cənab səfir Bilik Fondunun təkliflərini müsbət dəyərləndirdiyini və Fondla səfirlik arasında Niyyət Protokolu imzalanandan dərhal sonra əməkdaşlığa başlamağın zəruriliyini bildirib.
Cənubi Koreyanın Azərbaycandakı fövqəladə və səlahiyyətli səfirinə Bilik Fondunun hədiyyəsi təqdim olunub və Kim Çanq-gyu Fondun xatirə kitabına ürək sözlərini yazıb.
çap et