Azərbaycanda Fransız İnstitutunda Azərbaycanın yeganə fransızdilli mətbu nəşri olan “Le Carrefour” (Yol qovşağı) qəzetinin və www.lecarrefour.az saytının Azərbaycanda Frankofoniya həftələri çərçivəsində təqdimatı keçirildi.
Tədbirdə Fransanın Azərbaycandakı səfiri Orelia Buşez, Milli Məclisin Beynəlxalq münasibətlər və parlamentlərarası əlaqələr komitəsinin üzvü, millət vəkili Cavanşir Feyziyev, Mətbuat Şurasının sədri, millət vəkili Əflatun Amaşov, millət vəkili, “Yeni Azərbaycan” qəzetinin baş redaktoru Hikmət Babaoğlu, millət vəkili Kamran Nəbizadə, “Milli Məclis” jurnalının baş redaktoru Ülviyyə Abdullayeva, “525-ci qəzet”in baş redaktoru Rəşad Məcid, Fransa səfirliyinin, müxtəlif media təşkilatları və orqanlarının rəhbərləri və nümayəndələri, fransız dili üzrə mütəxəssislər və media nümayəndələri iştirak edirdilər.
Qəzetin təsisçisi və baş redaktoru Zeynab Kazımova “Le Carrefour” qəzetinin yaranması tarixindən, qəzetin ilk nəşrinin çapından, hazırkı durumundan, qəzetin elektron versiyasının fəaliyyətindən danışdı. Qəzetin yaradılmasında əsas məqsədin Azərbaycan-Fransa əlaqələrinin inkişafına dəstək vermək və Azərbaycanın təbliği olduğunu vurğulayan Zeynab Kazımova qəzetin və saytın fəaliyyətinin Azərbaycan-Fransa münasibətlərinin media sahəsindəki əməkdaşlığına yönəldiyini bildirdi. O, dedi ki, 2007-ci ildən fəaliyyət göstərən qəzetin bu il 10 yaşı olacaq. Zeynab Kazımova qəzetin 2009-cu ildən yaradılan www.lecarrefour.az saytının hazırda həm də gündəlik xəbər portalı kimi uğurlu fəaliyyətindən söz açdı, Zeynab Kazımova Azərbaycanın təbliği və tanıdılması, o cümlədən Ermənistan-Azərbaycan, Dağlıq Qarabağ münaqişəsi və ümumilikdə, Azərbaycan həqiqətlərinin fransızdilli xarici auditoriyaya çatdırılmasında qəzetin və saytın ölkəmizdəki və dünyadakı frankofon oxuculara istiqamətləndiyini bildirdi. Baş redaktor qəzetin fəaliyyətinin həm də Fransanın ölkəmizdə tanıdılması, Fransaşünas, fransız dili üzrə təhsil alan, bu dillə maraqlanan və fransız dilini sevən insanların böyük maraqla izlədiyini və onların maraq dairəsində olduğunu dedi. Zeynab Kazımova qəzetin Fransanın TV5 Monde və Beynəlxalq Fransızdilli Mətbuat Birliyi ilə əlaqələrindən də danışdı. O, “Le Carrefour” qəzetinin təşəbbüsü ilə Azərbaycan Mətbuat Şurası ilə birgə dəfələrlə Azərbaycanda xaricidilli medianın fəaliyyəti ilə bağlı müxtəlif tədbirlərin, dəyirmi masaların təşkil olunduğunu da diqqətə çatdırdı.
Fransanın Azərbaycandakı səfiri Orelia Buşez qəzetin fəaliyyətini yüksək qiymətləndirdi. 10 yaşını qeyd edəcək qəzetin Azərbaycan-Fransa əlaqələrinin inkişafında daha geniş rol oynayacağına inamını ifadə etdi. Azərbaycanla Fransa arasında əlaqələrin yaranmasının bu il 25 ilinin tamam olduğunu vurğulayan səfir iki ölkənin bütün sahələrdə əməkdaşlıq etdiyini dedi. O, Azərbaycanda yeganə frankofon qəzetin mövcudluğundan məmnun olduğunu dedi. Orelia Buşez Frankofoniya həftələri çərçivəsində Azərbaycanda müxtəlif tədbirlərin təşkil olunduğunu bildirərək qeyd etdi ki, Azərbaycanda Frankofoniya həftələri iki ölkə arasındakı münasibətlərin daha da inkişaf etməsinə kömək edəcək. “Qəzetin hazırkı fəaliyyəti fransızdilli oxucuları sevindirir, həmçinin bu qəzetin universitetlərlə və müxtəlif təşkilatlarla əməkdaşlığı məqsədə müvafiqdir” – deyə səfir vurğuladı. Xanım səfir qəzetə fəaliyyətində uğurlar arzuladı.
Azərbaycan Mətbuat Şurasının sədri, Milli Məclisin deputatı Əflatun Amaşov qeyd etdi ki, “Le Carrefour” qəzeti Azərbaycan Mətbuat Şurasının üzvüdür və ölkəmizdə yeganə fransızdilli qəzetdir. “Le Carrefour” qəzetinin rəhbərliyi ilə Azərbaycanda xaricidilli medianın fəaliyyətinə həsr olunmuş bir sıra tədbirlər keçirilib. “Ölkəmizdə fransız dili sevilir, məktəb və universitetlərdə tədris olunur. Bu dil azərbaycanlıların sevdiyi Hüqonun, Zolyanın, Volterin, Balzakın dilidir” – deyə Ə.Amaşov qeyd etdi. O, qəzetə fəaliyyətində uğurlar arzuladı.
Milli Məclisin deputatı Cavanşir Feyziyev Azərbaycanda fransızdilli qəzetin fəaliyyət göstərməsini yüksək qiymətləndirərək bunun vacibliyindən söz açdı. Azərbaycan və Fransa arasında əlaqələrə toxunan deputat qeyd etdi ki, fransız dili sovet dövründə də Azərbaycanda geniş yayılıb və istifadə olunub. Həmin dövrdə də tələbələr Fransaya təhsil almaq üçün yollanırdılar. Xanım səfirin fəaliyyətini yüksək qiymətləndirən deputat dedi ki, bu, Fransa-Azərbaycan əlaqələrinin daha da dərinləşməsinə kömək edəcək. Cavanşir Feyziyev “Le Carrefour” qəzetinin iki ölkə arasında media sahəsində əməkdaşlıqda körpü rolunu oynadığını bildirdi.
Milli Məclisin deputatı, “Yeni Azərbaycan” qəzetinin baş redaktoru Hikmət Babaoğlu isə ölkəmizdə nəşr olunan fransızdilli qəzetin Azərbaycan həqiqətlərinin dünyaya çatdırılmasında bir vasitə olduğunu bildirdi. İşğalçı Ermənistanın Fransada tarixən formalaşmış böyük diasporu olduğunu deyən deputat bu ölkədə işğalçı Ermənistanın daha çox təbliğ edildiyini bildirərək, Azərbaycanda fransızdilli qəzetin fəaliyyət göstərməsinin çox önəmli olduğunu və bu baxımdan fəaliyyətini yülksək dəyərləndirdi.
“525-ci qəzet”in baş redaktoru Rəşad Məcid rəhbəri olduğu qəzetlə “Le Carrefour” qəzeti arasında 2009-cu ildən qurulmuş yaradıcılıq əməkdaşlığı olduğunu bildirdi. Ölkənin yeganə fransızdilli nəşrinin fransızdilli auditoriyaya Azərbaycan həqiqətlərini çatdırdığını, 10 illik fəaliyyəti dövründə fransızdilli əcnəbilərə məlumat verməklə, məqalələr çap etməklə Azərbaycanı təbliğ etdiyini vurğuladı. O, qəzetə gələcək fəaliyyətində uğurlar arzuladı.
çap et