Aprelin 21-də Yeni Azərbaycan Partiyası (YAP) Gənclər Birliyi və "Hərbi Vətənpərvərlik və Mütəxəssis Hazırlığı Mərkəzi" MMC-nin təşkilatçılığı ilə ötən ilin aprel döyüşlərinə həsr olunmuş "Qələbədən qələbəyə" adlı atıcılıq turnirinin bağlanış mərasimi keçirilib.
YAP Gənclər birliyindən verilən məlumata görə, əvvəlcə turnirin finalçıları yarışıblar. Finala YAP-ın Nəsimi, Nizami, Xətai, Abşeron və Sumqayıt şəhər təşkilatının gənclər birliklərinin komandaları çıxıblar. Final mərhələsində YAP Abşeron rayon təşkilatı Gənclər Birliyinin komandası birinci yer tutub. YAP Xətai rayon təşkilatı Gənclər Birliyinin komandası 2-ci, YAP Sumqayıt şəhər təşkilatı Gənclər Birliyinin komandası isə 3-cü yer əldə edib.
YAP Nizami rayon təşkilatı Gənclər Birliyinin və YAP Nəsimi rayon təşkilatı Gənclər Birliyinin komandaları isə 4-cü və 5-ci yerləri bölüşüblər. Səma Əsədova isə turnirin "Ən sərrast atıcı"sı adına layiq görülüb.
Turnirin bağlanış mərasimində çıxış edən YAP Gənclər Birliyinin sədri, partiyanın Siyasi Şurasının üzvü Seymur Orucov və "Hərbi Vətənpərvərlik və Mütəxəssis Hazırlığı Mərkəzi" MMC-nin sədri Şahvələd Əliyev çıxış edərək YAP gəncləri arasında təşkil olunan atıcılıq turnirinin vətənpərvərlik təbliğatı istiqamətində həyata keçirilən işlərin tərkib hissəsi olduğunu və belə tədbirlərin Silahlı Qüvvələrin döyüş hazırlığı səviyyəsinin yüksəldilməsində əhəmiyyətli rol oynadığını bildiriblər.
Çıxışlarda gənclərə hərbi vətənpərvərlik duyğularının aşılanması, onların döyüşə hazırlıq keyfiyyətlərinin və psixoloji dözümlülüklərinin yoxlanılması, güllə atıcılığına marağın artırılmasının vacibliyi qeyd edilib.
Daha sonra qaliblərə kubok, diplom və hədiyyələr təqdim olunub.
Ceyhun ABASOV
çap et