Sentyabrın 17-də Türkmənistanın paytaxtı Aşqabadda V Asiya Oyunlarının açılış məsimi keçirilib.
Gənclər və İdman Nazirliyinin mətbuat xidmətindən verilən məlumata görə, açılış mərasimində gənclər və idman naziri Azad Rəhimov da iştirak edib. Səfəri çərçivəsində Azad Rəhimov bir sıra ölkələrin nümayəndə heyətlərinin üzvləri, o cümlədən, Türkiyənin gənclər və idman naziri, Belarusun idman və turizm naziri, Rusiya Federasiyası Tatarıstan Respublikasının gənclər və idman naziri və bir sıra beynəlxalq qurumların rəhbərləri ilə görüşlər keçirib.
Məlumat üçün əlavə edək ki, bu gün nazir A.Rəhimovun Minskə səfəri başlayır. Səfərin əsas məqsədi Minsk 2019 II Avropa Oyunları Koordinasiya Komissiyasının iclasında iştirak etmək və hazırlıq prosesi ilə yaxından tanış olmaqdır. Koordinasiya komissiyasının iclası çərçivəsində oyunların rəsmi proqramı, idman yarışlarının proqramı, atletlər kəndində görüləcək işlər, Milli Olimpiya Komitələri ilə işin qurulması, yayım, marketinq, könüllülük, nəqliyyat və digər mövzular müzakirə olunacaq. Səfər çərçivəsində nazir, Minsk 2019 II Avropa Oyunları Koordinasiya komissiyasının üzvü A.Rəhimov yarışların baş tutacağı Minsk Arena, Gimnastika arenası, Velosiped mərkəzi, Badminton mərkəzi və digər idman obyektlərinə də baxış keçirəcək.
Ceyhun ABASOV
çap et