3 oktyabr qüdrətli Xalq yazıçımız İlyas Əfəndiyevin anım günüdür
"Kənddən məktublar"la gəldin şəhərə,
Qismətin olmadı büllur saraylar...
Boylandı arxanca doğma dağ-dərə,
Ruhunda çağladı günəşlər, aylar.
Sənin ürəyində solmaz duyğular,
Sevdası yamyaşıl gülüstan varmış.
Natəvan, Nargilə,
Böyükbəy, Şahmar...
Kövrək xəyalını alıb aparmış.
Həyat bir meydandır:
Yaxşılar, pislər...
Təklənmiş Səriyyə sənə güvəndi.
Üstünə tökülən düşük xəbislər,
O kölgə adamlar hardadır indi?!
Qarabağ qaralıb həsrət odundan,
O yerin torpağı, daş-qayasıyıq.
Orda - İmarətdə* sənin adından
Xan qızı qəbrinə gül qoyasıyıq.
Sən bir möcüzəsən,
ucadan uca,
Sənədir şeirim,
Hər misram, bəndim.
Varsan, bizimləsən dünya durunca,
Ustadlar ustadım,
İlyas Əfəndim.
Şüvəlan,
22 sentyabr, 2017
*Xurşidbanu Natəvanın məzarı Ağdamın mərkəzində - "İmarət" adlanan ərazidədir.
çap et