"525-ci qəzet"in yaradılmasını yaxşı xatırlayıram. Yaradılmasına 525-ci kimi icazə veriləndə, bəlkə də, nəşr olunan yüzlərlə qəzet sırasından biri olacağı düşünülmüşdü. Ancaq başqa cür oldu.
Yubileyini fərəhlə qeyd etdiyimiz "525-ci qəzet" bizim mənsub olduğumuz nəslin gözü önündə "böyüyür", inkişaf edir, şöhrətlənir. Bu qəzeti hər kəs oxuyur: rəsmi dairələrin nümayəndələri də, tanınmış şəxsiyyətlər də, sadə insanlar da. Qəzet həm ictimai-siyasi, həm də ədəbi-elmi mühiti əks etdirmək baxımından lazımlı və əhəmiyyətlidir.
Mənim üçün bu qəzetin əhəmiyyəti və dəyəri həm də ona görə xüsusidir ki, ilk elmi məqaləm bu qəzetdə dərc olunub. Sərlövhəsi də belə olub: "Azərbaycançılıq mollanəsrəddinçilərin fərdi yaradıcılıq kontekstində: 1. Cəlil Məmmədquluzadə". Qarşılığı da belə olub ki, AzTV-də Xəbərlər redaksiyasının baş redaktoru işlədiyim vaxtlarda Rəşad Məcidin "10 sentyabr" adlı kitabı haqqında "Xəbərlər"in "Yeni nəşrlər"ində məlumat vermişdik. Beləliklə, bir-birimizi görmədən, tanımadan yazdıqlarımızı görmüşdük, tanımışdıq.
Günlərin bir günü başqa bir elmi məqaləmi "525-ci qəzet"in redaksiyasına özüm aparmağı qərara aldım. Niyyətim həm də Rəşad Məcidlə görüşüb tanış olmaq idi.
...Dəhlizdə xeyli gözləməli oldum. Redaksiyasının çayxanasında qızğın müzakirə gedirdi. Nəhayət, Rəşad Məcid çayxanadan çıxdı. Elə dəhlizdəcə çoxdanın tanışı kimi görüşdük, hal-əhval tutduq. Yazımı məsul katibə verməyi xahiş etdi. Növbəti nömrədə yazım dərc olundu... Sonralar biz müxtəlif tədbirlərdə görüşürdük. Mən onu tanıyırdım. Ancaq hiss edirdim ki, o, mənim sifətimi unudub. Uzun illər Rəşad Məcid məni yaxından görmədən, tanış olmadan yazılarımı öz qəzetində dərc etdi və indi də artıq tanıyır, dərc edir...
Mən müxtəlif peşə sahiblərindən "525-ci qəzet"in müstəqil, tərəfsiz, qərəzsiz, əsl ziyalı qəzeti olduğunu dəfələrlə eşitmişəm. 90-cı illərin sonunda Naxçıvana getmişdim. Azərbaycan Milli Elmlər Akademiyasının Naxçıvan bölməsində həmkarlarımla görüşdüm. Burada çalışan ziyalı insanların əksəriyyətinin bu qəzetin abunəçisi olduğunun şahidi oldum. O zaman (indi də) bölmənin rəhbəri akademik İsmayıl Hacıyev qəzet çıxan gündən onun nüsxələrinin tikilib saxlandığını, bu qəzetin ədalətli və oxunaqlı olduğunu elə inamla söylədi ki, mən o anda Bakıdan gəlmiş bir adam kimi, sanki mənə məxsus qəzetdən, Bakıda yaşayan jurnalistlərin qəzetindən söhbət getdiyi üçün qürur hissi keçirdim.
Fikrimcə, "525-ci qəzet" yalnız rəsmi materiallarla deyil, informasiya ilə də çox yüklənmir. Amma hər yazının məna-məzmun keyfiyyəti üstün olduğu kimi, öyrədici gücü, məlumat yükü də kifayət qədərdir. Burada jurnalistikanın bir çox janrlarından peşəkarcasına istifadə edilir. Dili kütləvidir, aydındır və rəvandır. Bütün bunların əsas səbəblərindən biri və bəlkə də, elə birincisi qəzetin daha çox işıqlı insanların tribunası olmasıdır. Azərbaycanın dəyərli şəxsiyyətləri - alimləri, yazıçıları, bəstəkarları, rəssamları, memarları, idmançıları və sıravi insanları daim bu qəzetdə çıxış edirlər. Akademik İsa Həbibbəylinin, professor Cahangir Məmmədlinin, yazıçı Anarın, şair Fikrət Qocanın, akademik Nizami Cəfərovun, ədəbiyyatşünas Vilayət Quliyevin, folklorşünas, akademik Muxtar İmanovun və başqa görkəmli insanların fikirlərini, ideyalarını bu qəzetdə oxumaq şəxsən mənə mənəvi toxlıq gətirir və bu qəzeti sevdirir. Amma bu sevdirməyin və sevməyin daha başqa səbəbləri də var. Bu səbəblər sırasında onun dövlətə, dövlətçiliyə, Azərbaycana, azərbaycançılığa xidmət etməsidir. Millətin taleyini düşünməsidir. Daim düzgün mövqedə dayanmasıdır. Ədəbiyyatdan, mənəviyyatdan yazmasıdır. Milli-mənəvi dəyərlərimizi qorumasıdır. Ədəbi dilimizi inkişaf etdirməsidir və digər səbəblərdir.
Görəsən, bütün bu dediklərimiz və deyə bilmədiklərimiz kimin və kimlərin sayəsində qəzet səhifələrinə çıxarılır. Burada öncə baş redaktorun rolunu qabartmaq istəyirəm. Qəzetin yaradıcısı və baş redaktoru Rəşad Məcidin şəxsiyyəti və dünyagörüşü əlbəttə ki, əsasdır. Ona görə ki, qəzetin ideya istiqamətini və müəyyən mənada, kollektivin yaradıcılıq üslubunu baş redaktor müəyyənləşdirir. Rəşad Məcid əslən qarabağlı olsa da, qəzet bütöv Azərbaycanın coğrafiyasını əhatə edir. Çünki Rəşad Məcid bütöv şəxsiyyətə malik olan insandır: səmimidir, realdır, prinsipialdır, erudisiyalı və mədənidir. Ən əsası isə onun vətəndaşlıq - azərbaycançılıq qayəsidir.
Rəşad Məcid mənim də məzunu olduğum və indi çalışdığım Bakı Dövlət Universiteti jurnalistika fakültəsinin məzunudur. Peşəkar jurnalistdir, həm də yazıçıdır, şairdir, ictimai xadimdir. Yazıçılar Birliyində yaradıcı gənclərə rəhbərlik edir. Onun novator yazıçı, istedadlı şair kimi özünəməxsus yaradıcılıq xüsusiyyətlərindən danışmaq fikrində deyiləm. Ona görə ki, "525-ci qəzet"in yubileyidir və mən onun qəzetindən və qəzetçilik fəaliyyətindən danışmalıyam. Həm də etiraf edim ki, Rəşad Məcidin şaxəli yaradıcılığının müxtəlif yönlərini akademik İsa Həbibbəyli bu yaradıcı insana həsr etdiyi maraqlı bir kitabında ustadcasına təhlil edib. Bu nəqamda mən Rəşad Məcidin jurnalist fəaliyyətinə daha çox üstünlük verirəm. Çünki Rəşad Məcid Azərbaycanın müstəqillik dövründə müstəqil, mükəmməl bir mətbuat yaratmışdır və həmin dövrün ab-havasına, tələblərinə uyğun publisistikanın əsas yaradıcılarından biridir. Eyni zamanda, Rəşad Məcid təşkilatçı kimi də özünü sübut etmişdir. Onun təşkilatçılığı nəticəsində "525-ci qəzet"in Vətən qeyrəti çəkən, millət taleyi düşünən kollektivi formalaşmışdır.
Mən qəzetin əməkdaşlarının demək olar ki, hamısını şəxsən tanıyıram. Onların jurnalist peşəkarlığını yüksək qiymətləndirirəm. Milli təfəkkürlü, vətəndaş mövqeli bu yaradıcı insanları əqidə birliyi birləşdirir, estetik ideal yaxınlaşdırır, yeniliyə can atmaq həvəsi bir araya gətirir. Qəzet redaksiyasında çalışanların əksəriyyəti ixtisasca jurnalistdir. Onlar həqiqətə, bir əqidəyə xidmət edirlər: vətənin, millətin azad və firavan yaşamasına, milli - mənəvi dəyərlərin inkişaf etdirilməsinə səy edirlər. Dövrün mühüm hadisələrinə, respublikamızda baş verən yeniliklərə, milli mənəvi dəyərlərə münasibət baxımından təxminən, eyni tərzdə düşünürlər, ona görə ki, doğrudan da, eyni estetikanın, idealın daşıyıcılarıdır. Və nəhayət, yaradıcılıqda yenilikçidirlər. Çalışırlar ki, yaradıcılıq tərzi ilə seçilsinlər. Hətta redaksiya ilə əməkdaşlıq edən müəlliflərin də fərdi üslubunu saxlamağa üstünlük verirlər. Bütün bu söylədiklərimiz təqdir olunası məsələlərdir və publisistika məktəbi dediyimiz bir anlayışı ifadə edir.
Oxucuların qəlbinə və şüuruna yol tapmış bu mətbu orqan öz yubileyini oxucuları ilə birlikdə qürur hissi ilə qeyd edir. Kollektivin buna tam haqqı var. 525-ci sırada olmaq olar, amma 525 media qurumunun içərisindən boy vermək, ucalmaq yüksək bacarıq və gərgin zəhmət tələb edir. Burada şübhəsiz ki, baş redaktor Rəşad Məcidin şəxsiyyətinin böyük rolu var. Texniki işçilər də daxil olmaqla redaksiya əməkdaşlarının əməyi, qabiliyyəti və mənəvi ucalığı Azərbaycan mediasında bu qəzetin yerini və səviyyəsini dəqiq müəyyən edir.
Təbrik edirik, "525-ci qəzet"! 25 yaşın mübarək olsun!
çap et