Ey vətən, ey ana, haray qoparın,
Qeyrət göstərməyin zəmanəsidir.
Bizim amalımız - haqqın işığı,
Yanan ürəklərsə pərvanəsidir.
Sanki ayrı düşüb ruhundan bədən,
Şuşa küsüb bizdən, yox gedib-gələn.
Ürək parçalayan, könül göynədən
Xocalı elinin ah-naləsidir.
Bir körpə can verir, "anacan" deyir,
Köksündən vurulmuş ana "can" deyir.
İgid qardaşlarım qana-qan deyir,
İntiqam yanğısı, divanəsidir.
Hardadır bu yerin firəvan çağı? -
Viranə qoyubdur yurdumu yağı.
Tabutum üstündə görsəz bayrağı,
Şərəfli ölümün nişanəsidir.
Qubadlı, Füzuli, Ağdamım mənim,
Kəlbəcər, Laçınım - yaylaq məskənim,
Azərbaycan kimi azad ölkəmin
Qarabağ incisi, dürdanəsidir.
Torpağım əsiri olun düşmənin,
Çəkirik həsrətin dağın, çeşmənin.
Döyüş yollarını keçən Rövşənin
Onu duyanlara bir naməsidir.
Rövşən NAĞIYEV
Qarabağ müharibəsi iştirakçısı
çap et