Litva Azərbaycanlıları Cəmiyyətinin sədri, Litva Respublikası Hökuməti yanında Milli İcmalar Şurasının üzvü, Dünya Azərbaycanlılarını Əlaqələndirmə Şurasının üzvü Mahir Həmzəyev Azərbaycan Yazıçılar Birliyinin sədri, Xalq yazıçısı Anara 80 illik yubileyilə bağlı təbrik ünvanlayıb.
"Hörmətli Anar Rəsul oğlu Rzayev!
Sizi - Azərbaycan ədəbiyyatının dünyaca ünlü klassikini, məşhur Xalq yazıçı və dramaturqunu, nüfuzlu ictimai-mədəni xadimi, şərəfli 80 illik yubileyiniz münasibətilə həm Litva Azərbaycanlıları Cəmiyyəti adından, həm də istedadınızın Litvadakı çoxmillətli pərəstişkarları adından səmimiqəlbdən təbrik edirəm.
Bir sıra əsərləriniz Litva dilinə tərcümə olunmuş və Litva oxucuları Sizi özünəməxsus üsluba malik nasir, çoxsaylı romanlar və kinossenarilər müəllifi, həmçinin, Litva ədəbiyyatının səmimi dostu kimi tanıyıb hörmət edirlər.
Siz bu gün Litva Azərbaycanlıları Cəmiyyətinin xətti ilə Litva mədəniyyət xadimləri və qələm qardaşlarınızla yaradıcılıq münasibətlərini davam etdirməklə, yüzillik qədim tarixə söykənən Litva-Azərbaycan ədəbi-mədəni əlaqələri ənənələrini genişləndirib zənginləşdirir, xalqlarımızın mədəniyyətlərarası dialoqunda yaradıcılıq nailiyyətlərinizlə şəxsən iştirak edirsiniz.
Azərbaycan Yazıçılar Birliyinin təcrübəli sədri olaraq Azərbaycan diaspor ədəbiyyatı təmsilçilərinin fəaliyyətini həmişə diqqət mərkəzində saxladığınız üçün, onlara əsl vətənpərvər ziyalı və ustad sənətkar münasibəti göstərib böyük həssaslıqla yanaşdığınıza görə Sizə minnətdarlığımı bildirirəm.
Hörmətli Anar müəllim, Sizə möhkəm cansağlığı, xoş əhval-ruhiyyə, uzun yaradıcılıq illəri və yeni-yeni parlaq ədəbi tapıntıların sevincini arzulayıram".
çap et