“Ekstremizm sərhədlər tanımayan bir təhdiddir. Bunun qarşısını almaq üçün birgə səylərin göstərilməsi vacibdir".
APA-nın xəbərinə görə, bunu BMT-nin Azərbaycandakı rezident əlaqələndiricisi Qulam İshaqzai "Zorakı ekstremizm ilə mübarizə" adlı beynəlxalq konfransda deyib.
O bildirib ki, sülh və təhlükəsizliyin qorunması, dayanıqlı inkişafın təmin edilməsi, insan hüquqlarına hörmətin artırılması ekstremizmə qarşı mübarizədə vacib əhəmiyyət kəsb edir: “BMT Azərbaycanın ekstremizmə qarşı mübarizədə səmərəli əməkdaşlığını dəstəkləyir”.
Q. İshaqzai Azərbaycanda dini tolerantlığın və harmoniyanın mövcud olduğu bir cəmiyyətin formalaşdığını diqqətə çatdırıb. O bildirib ki, Azərbaycanda dünyəvilik qorunur və ekstremizmə qarşı ciddi mübarizə aparılır.