525.Az

Gürcüstanda yaşayan bir qrup azərbaycanlı din xadimi Prezidentə məktub göndərdi


 

Gürcüstanda yaşayan bir qrup azərbaycanlı din xadimi Prezidentə məktub göndərdi<b style="color:red"></b>

Gürcüstanda yaşayan bir qrup azərbaycanlı din xadimi Azərbaycan Prezidenti İlham Əliyevə məktub göndərib.

APA xəbər verir ki, məktubda deyilir:

“Möhtərəm cənab Prezident,

Biz, Gürcüstanda yaşayan bir qrup azərbaycanlı din xadimləri Azərbaycanın ərazi bütövlüyünün bərpası və işğal olunmuş ərazilərinin erməni silahlı birləşmələrindən təmizlənməsi uğrunda sentyabrın 27-dən başlayan Vətən müharibəsini çox diqqət və həyəcanla izləyirik. Uzun illərdən bəri daim atəşkəsi pozan və sülh danışıqlarına əməl etməyən düşmənlə başqa dildə danışmağın mümkün olmadığını iyul ayında Tovuz rayonuna namərdcəsinə edilən hücumdan sonra bizlər də gördük.

Gürcüstanda yaşayan soydaşlarımızın qəlbi bu gün Azərbaycanla, Azərbaycan əsgəri ilə birgə döyünür. Biz başqa ölkənin vətəndaşı olsaq da, milliliyimiz və milli dövlətimiz üçün Sizin hər bir çağırışınıza hazırıq. 30 illik həsrətin bitəcəyinə inanırıq. Gürcüstandakı soydaşlarımız Sizinlə həmrəydirlər, hər zaman ana Vətənimizə dəstək verməyə, Sizinlə bir səngərdə olmağa hazırdırlar. İnşallah, tezliklə Azərbaycan xalqı Qarabağda qələbə çalacaq, sülh və ədalət bərqərar olacaqdır.

Möhtərəm cənab Prezident, Sizin daim təmkinlə söylədiyiniz “Azərbaycan güclü dövlətdir və Azərbaycanın güclü ordusu var” ifadəsi bu gün hər bir azərbaycanlı üçün qürur mənbəyinə çevrilib. Vətən müharibəsinin getdiyi bu dönəmdə bir daha əmin olduq ki, belə bir güclü ordu Sizin kimi qətiyyətli Müzəffər Ali Baş Komandanın dəqiqliklə yürütdüyü hərbi quruculuq siyasəti sayəsində ərsəyə gəlib.

İnanırıq ki, Sizin qətiyyətli siyasətiniz uğurla nəticələnəcək, tezliklə torpaqlarımız azad ediləcək. Bu gün Azərbaycanın ərazi bütövlüyünün təmin olunması bizim qürurumuz və müqəddəs borcumuzdur.

Dualarımız Sizinlədir, müzəffər Ordumuzladır. Qarabağda dalğalanacaq Azərbaycan bayrağı naminə canından keçən hər bir şəhidimizə Allahdan rəhmət diləyirik! Allah yaralılarımıza tezliklə şəfa versin.

Şanlı Azərbaycan Ordusuna eşq olsun! Allah Sizi daim müzəffər eləsin!”

Məktubu Qafqaz Müsəlmanları İdarəsinin Gürcüstan üzrə səlahiyyətli nümayəndəsi Hacı Əli Əliyev, Qafqaz Müsəlmanları İdarəsinin Gürcüstan nümayəndəliyinin əməkdaşı Hacı Eldəniz Sadıqov, Bolnisi rayonunun baş axundu Əxmədov İfrət, Bolnisi rayonu Dəllər kəndinin axundu Əhmədov Elsevər, Faxralı kənd məscidinin axundu Şərifov Sabin, Ağammədli kənd məscidinin axundu Əliyev Çingiz, Xancıxazdlı kənd məscidinin axundu Mamedov Mir Əli, Goraxı kənd məscidinin axundu Quliyev Mahir, Bəylər kənd məscidinin axundu Sadiqov Mübariz, Marneuli rayonu Təkəli kənd məscidinin axundu Hacıyev Fəxrəddin, Beytarafçı kəndinin imamı Şəmşiyev Tofik, Qrıxlı kənd məscidinin axundu Məmmədov Azər imzalayıblar.

 





27.10.2020    çap et  çap et