"Qələbə yollarında" silsiləsindən
VƏTƏN
Qayadan
qırıq-qırıq qopan
mərmi timsallı
qəlpəsən, Vətən!
Yenə də
ruhuma çökmüsən,
gözümün önünə
gəlmisən, Vətən!
Sözümdən
tonqal çatacağam
əsgərlər üçün.
İsinə bilsinlər
oduna, Vətən!
Məni də çağır
od saçan cəbhəyə.
Gücüm çatana qədər
yetim dadına, Vətən!..
ÜÇRƏNGLİ BAYRAQ
Havada
bir əsim külək yox,
titrəmir, tərpənmir
bir yarpaq da belə.
Sükutu əridən
şam da, çıraq da belə.
Əlimdə tutduğum
ağappaq varaq da belə.
Gözüm seçən qədər
yaxın da, uzaq da belə.
Kölgələr elə bil tablo -
düzülüb torpağın üstə.
Donub boğazlarda
sanki nəfəs də.
...İçimdə
qəfildən bir bayraq
çırpınıb qanadlanır
uçurur səmaya məni.
Baxın,
bir də baxın
Millətin,
Cümhuriyyətin
ruhundan qopan
Üçrəngli bayrağa!
Gör necə qaldırır
himn oxuyan milyonları -
Azərbaycanı ayağa!..
İGİD ANASI
Yanımdan ötən
bu gözəlin
gözlərində qaldımı şəklim?
Yol verin,
yol verin siz ona,
qarşısından çəkilin.
O,
bu günün çiçəyi,
açıq, aydın səması,
ürəkləri oynadan
bir ilahi duası.
Allah,
özün qoru bu mələyi.
Bəlkə də o,
mələk yox,
üzümüzə açılan
xoş sabahlarda,
yurda dayaq olası,
neçə igid anası...
İGİD ƏSGƏRLƏRİMİZƏ
Ümidim,
igidim!
Qollarını geniş aç,
sarıl
azad etdiyin torpağa!
Ətrini sinənə çək
qəlbən sevdiklərinin
tanış qoxusu tək.
Qaldır
ayaq altındakı
sarı yarpağı.
Öp
və gözlərin
üstə qoy.
Bu yarpaq
coşdursun qanını,
əyilməz vüqarını!
Əsgərim,
cəsurum,
şığı irəli!
Bil ki,
sənə dikilib
bu xalqın
yol çəkən gözləri!..
ÜÇKÜNC MƏKTUBLAR
Üçkünc məktubların vaxtı
çoxdan ötüşüb.
Qoca poçtalyonlar,
barıt qoxuyan,
qorxu, həsrət daşıyan
meşin çantalar kimi.
İndi səngərlərdə
məktub yazılmır.
Üçkünc məktubların
yerinə daha
azğın düşmənlərə
qəbir qazılır.
İndi
məktub gəlmir
daha cəbhədən,
qələbə müjdəli
xəbərlər gəlir.
Hər səhər
can Vətən,
bu əziz Vətən
böyüyür
düşmənlər qovulan
Kəndbəkənd, şəhərbəşəhər!
Ucalır, yüksəlir,
yağıya göz dağı
üçrəngli bayraqlar qədər...
çap et