Gürcüstan parlamentində təmsil olunan azərbaycanlı deputatlar hakim "Gürcü Arzusu" Partiyasının dəstəklədiyi prezidentliyə müstəqil namizəd Salome Zurabaşvilinin prezident seçkilərinin qalibi olmasını müsbət qiymətləndiriblər.
Gürcüstan parlamentində təmsil olunan azərbaycanlı millət vəkili Savalan Mirzəyev "525"-ə açıqlamasında bildirib ki, Gürcüstan əhalisi seçkilərdə prinsipial və düzgün seçimini edib.
"Bir neçə aylıq marafon tamamlandı və Gürcüstan əhalisi prinsipial seçimini etdi. Qardabani əhalisi dürüst şəkildə qalib gəldi və qanlı keçmişdən imtina etdi. Mən bu müddət ərzində yanımızda durub, yorulmadan çalışan insanlara cox sağ olun deyirəm. Biz onların sayəsində bu nəticəni əldə etdik" - deyə, o qeyd edib.
"Bəs Zurabaşvilinin qələbəsini Gürcüstan-Azərbaycan münasibətləri baxımından necə qiymətləndirsiniz? Onun ermənipərəst olduğu bildirilir və bu, gerçəkdirsə, Gürcüstan-Azərbaycan münasibətlərində problemlər yaşayanmayacaq ki" sualına cavabında isə S. Mirzəyev Zurabaşvilinin ermənipərəst olması iddiasına təəccübünü gizlətməyib və bu yöndəki iddiaları təkzib edib.
Eyni zamanda, qeyd edib ki, Zurabaşvilinin prezidentliyi Gürcüstan-Azərbaycan münasibətlərinə yalnız və yalnız müsbət təsir göstərəcək.
"O, savadlı, təcrübəli diplomatdır. Bu baxımdan, ümidvaram ki, münasibətlərimiz daha da möhkəmlənəcək" - deyə, S.Mirzəyev vurğulayıb.
Digər azərbaycanlı millət vəkili Ruslan Hacıyev isə qeyd edib ki, Gürcüstan və gürcüstanlılar üçün yeni inkişaf mərhələsi başlayır.
"Bundan sonra da hakimiyyətimiz ölkəmizin inkişafı, rifahı, əmin-amanlığı və uğurlu gələcəyi üçün əlindən gələni edəcək. Gürcüstanımız, regionlarımız və Marneulimiz üçün yeni inkişaf mərhələsi başlayır. Biz hər bir vətəndaşın yanındayıq və onlarla birlikdə vətənimizi daha aydın gələcəyə, inkişafa doğru aparacağıq" - deyə, R. Hacıyev əlavə edib. O da öz növbəsində Zurabaşvilinin iqtidarlığı dövründə Gürcüstan-Azərbaycan münasibətlərinin inkişaf edəcəyini söyləyib.
Kamil HƏMZƏOĞLU
çap et