İldən-ilə həyat və məişət şəraitimiz yaxşılaşsa da, heç kimə sirr deyil ki, şəhər, qəsəbə və kəndlərimizdəki əksər məzarlıqların ərzisində çox vaxt səliqəsizlik hökm sürür. Nədənsə, bizim mentalitetimizdə yalnız öz yaxınlarımızın qəbirlərinin ətrafının az-çox nizama salınmasından başqa, onların uyuduğu qəbirstanlıqların da səliqəli olmasının qayğısına qalmaq düşüncəsi zəifdir.
Bu baxımdan, son illər Qazaxda yaranmış ənənə vətəndaşlarımız üçün nümunə ola bilər. Sən demə, artıq bir neçə ildir ki, Yeni ilin gəlişi ərəfəsində rayon ərzaisində yerləşən bütün qəbiristanlıqlarda zəruri səliqə-sahman işlərini nəzərdə tutan kütləvi iməcilik keçirilir.
Son belə iməcilik ötən həftənin son iki gününü əhatə edib. Bu ümumxalq tədbirində bütün yaşayış məntəqələrinin, o cümlədən, kəndlərin ərazilərindəki qəbiristanlıqların içərisində və ətrafında təmizlik-abadlıq işləri aparılıb, məzarlıqlar alaq otlarından, kol-kosdan təmizlənib, ehtiyac olan yerlərdə isə qəbiristanlıqların ətrafına yeni metal çəpərlər və ya torlar çəkilib.
Rayon sakinləri bu savab işi ilboyu bir neçə dəfə davam etdirəcəklərini də dilə gətiriblər.
Zakir MURADOV
Qazax
çap et