525.Az

Portlandda 31 dekabr - Dünya Azərbaycanlılarının Həmrəylik günü elan olundu


 

Portlandda 31 dekabr - Dünya Azərbaycanlılarının Həmrəylik günü elan olundu <b style="color:red"></b>

ABŞ-ın Meyn ştatının Portland şəhərinin meri Etan Strimlinq və şəhər Şurasının üzvləri tərəfindən 31 dekabr Dünya Azərbaycanlılarının Həmrəylik Günü elan edilib.

Səfirlikdən verilən məlumata görə, bununla bağlı yazılı bəyannamədə Azərbaycan Xalq Cümhurriyyətinin 28 May 2018-ci ildə yaradıldığı, bu dövlətin ilk müsəlman respublikası olmaqla bir çox qabaqcıl islahatlar həyata keçirdiyi, o cümlədən qadınlara seçki hüququnu verdiyi vurğulanır.

Sənəddə qeyd edilir ki, Azərbaycan Respublikası 1991-ci ildə öz azadlıq və müstəqilliyini bərpa etdikdən sonra dünyanın ən sürətlə inkişaf edən və müasirləşən dövlətinə çevrilmiş, regionda ən böyük iqtisadiyyata sahib olmuş və Cənubi Qafqazda ABŞ-ın ən iri ticarət tərəfdaşıdır. Bununla yanaşı, bəyannamədə vurğulanır ki, Azərbaycanda müsəlman, xristian və yəhudilərin birgə yaşayışı və dinlər arası harmoniya ilə bağlı zəngin ənənə mövcuddur.

Bəyannamədə Azərbaycanın ərazi bütövlüyü, suverenliyi və müstəqilliyi ABŞ tərəfindən qeyri-şərtsiz dəstəkləndiyi də vurğulanır.

Sənəddə xüsusi olaraq Meyndə yaşayan Azərbaycan icmasının Portland şəhərinin mədəni müxtəlifliyi və zənginliyinə, habelə iqtisadi rifahına fəal töhfə verdiyi qeyd edilir. Həmçinin, Amerikada yaşayan Azərbaycanlıların ABŞ-da tanınmış etnik icma olması ilə yanaşı regional müxtəlifliyə, mədəniyyətlərarası anlaşmaya, sülh və rifaha aktiv töhfə verməsi də vurğulanır.

Bəyannamədə o da bildirilir ki, 31 dekabrın dünyadakı 50 milyon, o cümlədə ABŞ-da yaşayan 400 min Azərbaycanlı tərəfindən Həmrəylik Günü kimi qeyd edilir. Bu xüsusda sənəddə 31 dekabr tarixi Portland şəhərində “Azərbaycanlıların Həmrəylik Günü” elan edilir və Portland meri şəhər sakinlərini bu Günü qeyd etmək üçün ona qoşulmağa çağırır.

Xatırladaq ki, Portland meri tərəfindən sözügedən bəyannamə ABŞ-ın Meyn ştatında yaşayan Azərbaycan icmasının fəallarına təqdim edilib.

 





01.01.2019    çap et  çap et